Mizoram gas quota Tripura-ah a kal em? Gas-ah hma la turin ZMP-in sorkar phût

Ṭangrual pawl, Zoram People's Movement (ZPM) ṭhalaite chuan thuchhuah siamin, tunlai hian Mizoramin eirawngbawlna gas a lakna pui ber Borkhola Bottling Plant aṭangin Mizoram chan tur gas eng emaw zat Tripura hnenah pek a nia an hriat thu an tarlang a; a rang thei ang bera chhui chianga hma la turin Mizoram sorkar an phût.

ZPM ṭhalai chuan, ZPM a sorkar huna an ngaih pawimawh ber ber tur pakhat chu–mihring nunna atana mamawh bulpui (six basic needs) a ni tih sawiin, Mizoramin gas khamkhawp a neih hleih theih loh laia tunlaia Borkhola aṭanga Mizoram quota tur gas Tripura-ah nasa taka phurh liam ṭhin nia hriat chu an ngaimawh thu an sawi.

ZPM ṭhalai chuan, Mizoram sorkar chu gas chungchanga harsatna thleng tawh ṭhinah, sorkar mawh a ni lo, tia kut a sil mai ṭhin ang chu ti tawh lo turin an chah a, "Eng kawngah pawh ram mipuite mamawh leh harsatna chinfelsak hi sorkar mawh a ni tih hria a, he thil hi a rang thei ang bera chhui chianga hma la turin sorkar kan phût a ni," an ti.

Mizoramin fûrpui a hmachhawn dawn mek tih sawiin ZPM ṭhalai chuan, fûrpui laiin Mizoram mipuiin harsatna an tawh lohna tura ni tin ei leh bar thila inhmakhua turin sorkart an ngen a; pumpelh theih reng harsatna thlen tawh hnua chhuanlam dawráwm tê tê hmanga phatmar ngai loa awm turin sorkar an chah a ni.