KHAWTHLIR

PRISM parking Fee tihtawp tiam
PRISM party chuan thuchhuah siamin, sorkarna an chan chuan Aizawl khawpuia PWD kawngpuia parking fee khawn ṭhin an tihtawp dawn thu an tarlang a, "Kan khawpui chhung kawng, a bik takin main road hi kan sorkar hunah kan zauh dawn a, kawngpui dunga hrui inzam hnawk hi kan thianfai vek bawk dawn a ni," an ti.

Thisen pe
Champhai Bethel Branch YMA chuan nimin khan an YMA Inah blood donation camp an huaihawt a, an member mipa 28 leh hmeichhia pariatte'n Champhai Dist.Hospital tan thisen unit 36 an pe.

Heroin man
Champhaia Excise & Narcotics department enforcement -te chuan nimin chhun dar 11 khan Mualkawi leh Zotlang inkarah heroin gram 44 leh a neitua puh Lalmuanpuia (30) s/o Thangzawma, Zuangtui, Aizawl nia inchhál an man a; Narcotics Drugs & Psychotropic Substances Act, 1985 tlawhchhanin thubuai an siamsak.

Jubilee lawm
Baptist Church of Mizoram (BCM), Bilkhawthlir Kohhran chuan May 18 aṭang khan an kum 25-na, silver jubilee an lawm a, nimin khan a lawmna pui ber an hmang. BCM, Bilkhaw­thlir hi May 22, 1993-ah din ṭan a ni a, din a nih lai hian chhungkaw 13 awmin, member 45 an ni.

Hostel hawng
Mara Students' Boys Hostel, Zotlang, Aizawla mi chu nimin khan Assembly speaker Hiphei-a'n a hawng. Hostel sak nan hian Non-Lapsable Central Pool Resources Fund aṭangin cheng nuai 269.18 hmuh a ni a, July 17, 2014-ah sak ṭan niin, May 31, 3018-ah sak zawh a ni. Hostel hawnnaah hian minister C Ngunlianchunga leh MADC chief executive member N Zakhai-te pawh an tel.

Secy kaisang
Mizoram sorkar hnuaia secretary ni lai Biak­tluanga, IAS chu January 1, 2018 aṭangin commissioner & secretary-ah kaisantir a ni. Biak­tluanga kaisantirna order hi Ministry of Home Affairs chuan May 18, 2018 khan a tichhuak.