Covid-19 vei mi 9 hmuh belh Hripui vei 102 an awm tawh

Zoram Medical College (ZMC) Covid-19 Laboratory-ah June 10, Nilaini zan khan Covid-19 hripui vei mi pakua hmuh chhuah leh a ni. Heti hian Mizoramah hripui vei mi 102 an awm tawh a, chu'ng zinga 101 chuan an vei mek.

Covid-19 vei hmuh chhuah tharte hi hmei­chhia pasarih leh mipa pahnih niin, kum 22 leh 46 inkar an ni a, Aizawl district mi pariat leh Mamit district mi pakhat an ni. Nilaini khan mi 135 endik a ni a, an zinga pakuain hripui an vei laiin, mi dang 126 chuan an kai lo.

An zinga panga chu tun hnaia Delhi aṭanga haw an ni a, Maharashtra aṭanga haw pathum leh West Bengal aṭanga haw pakhat an awm bawk a; pariat chu quarantine facility-a awm lai niin, pakhat chu home qua­rantine lai a ni. Mi pa­khatin a taksaah harsatna lian vak lo a nei (symptom a nei) a, mi dang zawngin symptom an nei lo thung. 

Mizoramah Covid-19 kai mi 102 an awm tawh a, mipa leh hmeichhia 51 ve ve an ni. Vei tawh mi 102 zinga pakhat, March 24, 2020-a hmuh chhuah chu a dam tawh a, mi dang 101-te'n vei mekin, anni hi June 1-10 chhunga hmuh chhuahte an ni.

SRH-ZMC Covid-19 Bulletin tarlan danin, nimin khan State Referral Hospital (SRH)-ah Covid-19 vei mi 11 dah luh thar an ni a, hripui vei rinhlelh thilah mi pasarih admit thar an ni bawk. Rinhlelh dah luh thar zinga paruk chu nimin khan an swab sample endik a ni a, mi dang pakhat chu vawiinah endik a ni ang. Nimin khan mi 200 chuangte swab sample endik leh a ni a, vawiinah result hriat theih beisei a ni.

SRH-ah hian hripui vei mi 34 enkawl mek an ni a, pakhat chu ICU-ah enkawl niin, mi dang zawng chu Isolation Ward-ah enkawl an ni. Isolation Ward-a awm zinga mi pakhat­ a khua a sik a, ngaihtuah­awm a ni lo. ICU-a awm pawhin harsatna lian tham a nei lo bawk.