Inkhung zawh hnua Covid-19 vei Chhungte sample endik a ni dawn

Quarantine facility-a inkhung hun a zawh hnua chhuak tawh, Covid-19 vei tih hmuh chhuah leh mi pahnihte chu an chhungte Covid-19 an vei leh vei loh endik vek a ni dawn. An swab sample lak tawh niin, ZMC Covid-19 Laboratory-ah thawn a ni tawh a, result kan hre hman lo.

Hetih lai hian, June 10, Nilaini zana Covid-19 vei hmuh chhuah mi pakua zinga mi pakhat, mahni ina inkhung hrang (home quarantine) lai chu a chhungte nen in khata awm a ni lo a, in (building) hranga inkhung a ni.

Covid-19 veite'n mi dang an kài chhâwn theih àwmte chhui zuitute hnen aṭanga Vanglaini palai thu dawn danin, Dehradun aṭanga lo haw zirlai pakua leh anmahni hruaitu mi pahnih, an vaiin mi 11-te chu Aizawl daia huan pakhatah khung hran an ni. An vai hian RTPCR hmangin an swab sample endik a ni tawh a, Zarkawt leh Upper Republic Venga chengte chuan Covid-19 an vei tih hmuh chhuah a ni.

Mi 11-te chu an inkhung hun hmang zoa an chhuah tur ní, June 7 khan an swab sample lak a ni a, June 9-ah an result hriat a ni. Covid-19 vei mi pahnih an awm tih hriat a nih veleh mi pahnihte'n an kai theih àwmte chhui nghal a ni a; an pahnih hian an inkhungna hmun aṭangin an pate'n an hruai haw ve ve a ni.

Zarkawta mi chu fimkhur thilah a pain chawlh lain, pisa a kai lo a, an chhungkuain an inkhung nghal a, Covid-19 vei bik chu pindan hranah a inkhung. June 7 aṭangin an chhung­kuain khawlaiah an chhuak tawh lo.

Upper Republic-a Covid-19 vei hmuh chhuah pawh a chhungte'n pindan hrangah an khung nghal a. Hetih lai hian, a hmaa an in-khung hranna hmun aṭanga hruai chhuaktu a pa chu June 8 leh 9 khan a hnathawhna hmunah a la kal a, a hnathawhna hmuna thawk vete chuan mi dang bula a awm chhung zawngin hmai a tuam bakah, document inpek chhâwn dáwnah hand sanitiser a hmang zel niin Vanglaini palai an hrilh.

Covid-19 vei chhungte swab sample endikna a chhuah hunah hripui an kai a nih chuan an kai chhàwn theih àwmte chhui zui leh a ni ang.

Hetih lai hian, Nilaini zana Covid-19 vei hmuh chhuah zinga home quarantine lai mi pakhat chu a chhungte nen in khata awm loin, an in bula in hranah amahin a awm a, eirawng pawh amahin a inbàwl chawp tih a chhui zuitute chuan an finfiah. Chutih rualin, a chhungte chu Covid-19 an kai leh kai loh endik ve tho tur a ni.