COVID-19: Mizoram dinhmun Hripui vei 61 hmuh belh a ni

November 10, Thawhlehni khan Mizoramah Covid-19 vei mi 61 hmuh chhuah an ni a, nimin khan hripui laka fihlim tawh mi pahnih chhuahtir an ni thung.

Covid-19 vei hmuh chhuah thar mi 61-te chu mipa 30 leh hmeichhia 31 an ni a; ZMC laboratory-a hmuh mi 44, TrueNAT-PCR hmanga Hnahthiala hmuh mi pakhat leh, Rapid Antigen Test (RAT) hmanga Lawngtlaia hmuh mi 16 an ni.

Nimin khan tlai dar 5 thlengin, hripui laka fihlim tawh mi pahnih chhuahtir an ni a; Saitual district mi, an district-a enkawlna hmun aṭanga chhuak niin, heti hian Saitual district-ah Covid-19 positive an awm tawh rih lo.

Mizoramah Covid-19 positive mi 3,217 hmuh chhuah a ni tawh a, mipa 2,397 leh hmeichhia 820 an ni. Mi 3,217 zinga mi 2,688 (83.56%) chhuahtir an ni tawh a, mi pahnih (0.06%) thi tawhin, enkawl mek mi 527 (16.38%) an awm.

Mizorama hripui vei hmuh tawhte zinga mi 1,445 chu Mizoram chhunga kái an ni a, mi 1,772 chu state páwn aṭanga rawn lut an ni.

November 10, Thawhlehni khan Mizoramah swab sample 1,412 endik a ni a; chungte chu ZMC-a endik 659, TrueNAT-PCR hmanga district paruka endik sample 50 leh, RAT hmanga district 11-a endik sample 703 a ni.

Sorkar thuchhuah tarlan danin, Covid-19 vei ZMC laboratory-a hmuh chhuah thar mi 44 chu mipa 22 leh hmeichhia 22 niin, Aizawl district-a sample lak vek a ni a; mi 40 chu Mizoram chhunga kái chhâwng (local positive contact) niin, mi pali chu state páwn aṭanga tun hnaia rawn lut an ni thung.

State páwn aṭanga rawn lut tharte chu - Chanmari venga mipa kum 30, India sipai, Sikkim aṭanga rawn haw te, Bung Bangla quarantine facility-a awm mek Shivalaya Construction hnuaia thawk tura rawn lut mipa pahnihte leh, Tamil Nadu aṭanga rawn lut mipa kum 50 mi, BRO quarantine facility-a awm mekte an ni a; an vaiin symptom an nei lo.

Mizoram chhunga káite dinhmun chiang zawk chu table-ah tarlan a ni.

TrueNAT-PCR hmangin Hnahthial Hospital laboratory-ah hripui vei mipa kum 24 mi hmuh chhuah a ni a, ABCI hnuaia thawk tura Uttarakhand aṭanga rawn lut, ABCI camp-a awm lai, symptom nei lo a nih thu, sorkar thuchhuahin a tarlang.

RAT hmangin Lawngtlaiah Council Veng (Dinthar) mi 16 - mipa pasarih leh hmeichhia pakua hmuh chhuah a ni a; an zingah nausen thla 8 mi leh naupang kum 1, 3, 7 leh 8 mite an tel a, village task force member pathum an tel bawk. Natna lang chhuak lo vek an ni.