Lungleiah RT-PCR bunna tur peih hnai ; Champhaia RT-PCR bunna tur la thlang lo

Lungleia Reverse Transcription polymerase chain reaction (RT-PCR) khawl bun lailâwkna tura ruahman Tourist Lodge building chu khawl bun theihna turin peih a ni dawn hnai. Champhaiah erawh chuan RT-PCR khawl bunna tur hmun thlan a la ni lo.

Gauhati High Court, Aizawl Bench thupek anga Mizoram sorkarin Lungleia RT-PCR bun a nih theihna tura hma latu tur committee a dinte'n RT-PCR bun lailawkna atana an rawt Tourist Lodge thawm ṭhat hna chu thawh mek zel a ni a, an peih ṭêp tawh nia thu dawn a ni. Hnathawh mek chu YMA Sub-Headquarters, Lunglei hruaitute'n vilin an endik ṭhin.

Vanglaini palai zawhna chhangin Lunglei Sub-Hqrs. YMA president Lalrotluanga chuan, hnathawh an endik hnuhnun ber lai chuan an zawh ṭep tawh thu a sawi a, "An zawhfel veleh RT-PCR khawl bun hna thawh ṭan a ni nghal turah kan ngai. Chu chu kan duh dan pawh a ni," a ti.

Lungleia RT-PCR bun a nih theihna atana hma latu committee-a tel Lalrotluanga chuan, committee chu a hmunhma zawng tur ringawt an nih thu sawiin, "A hmunhma tur rawtna kan thehlut tawh a, a bak chu sorkarin a bawhzui turah ka ngai. Committee chuan hmalakzuina tur a nei tawh lo," a ti a; YMA ang chuan a ṭul anga hma an lak zui zel tur thu a sawi.

Champhaiah pawh RT-PCR khawl bun tuma hmalak mek a ni a, khawl chu October 12, 2021 khan Champhai South bialtu MLA TJ Lalnuntluanga'n District Hospital hotute hnenah a hlan. Hetih lai hian, RT-PCR bunna tur hmun thlan a la ni lo.

Vanglaini thu dawn danin, Directorate of Health & Medical Education (DHME) chuan RT-PCR khawl bun dan turah rawtna thlen turin a thuphungin Champhai District Hospital hotute a hriattir a ni. Hetih lai hian, ziaka hriattirna an la dawn loh avangin District Hospital hotute chuan rawtna an la thlen lo thung.

Champhai District Hospital medical superintendent Dr Zatluanga chuan, RT-PCR laboratory changtlung tak neih an duh thu Vanglaini palai zawhna chhangin a sawi a, "Tuna TrueNat laboratory kan dinna bulah hian RT-PCR lab. ṭha tak din theihah kan ngai," a ti.

Dr Zatluanga chuan, RT-PCR lab. chu an district-in an mamawh chûk chûk lo tih sawiin, "Tun dinhmunah TrueNat khawl pahnih leh extractor pali kan kawl a, Covid-19 sample test tur backlog kan nei ngai lo. Hmun ṭhenkhat chuan ZMC-ahte test turin an thawn a, keiniah chuan chutiang a ngai ve lo," a ti a; Khawzawl district-a mite an endiksak zawk ṭhin thu a sawi.

Sorkar thuneitute'n RT-PCR khawl bun hmanhmawh an duh a nih erawh chuan hmun an nei thu sawiin Dr Zatluanga chuan, "Eye ward-ah hian a bun theih turah kan ngai. Thuneitute aṭangin thu kan la hmuh loh avang leh he lai hmun hi kan hman ṭangkai tho si avangin kan la khawih danglam lo. Thu kan hmu a nih chuan khawih danglam theih reng tho a ni," a ti.