Bru-te vote thlakna turah ECI-in thu thar la nei lo

Tuirial Assembly constituency by-election atan ni kua chiah awm tawh mah se, Election Commission of India (ECI) chuan Tripura refugee camp-a Bru awm, Mizoram electoral roll-a chuangte vote thlak dan turah thutlukna a la siam lo.

Tarlan tawh angin, Mizoram Election department hotute chuan Tripura-a Bru-te chu Mizoram chhunga an awmna polling booth ngeia vote thlaktir turin ECI an ngen a; Tuirial bial by-election hun tur puan hma leh puan hnuah ngenna an thlen ve ve tawh. Chutih laiin, nimin thleng khan ECI chuan thu thar a la nei lo a ni.

Vanglaini palai zawhna chhangin Election department hotute chuan, Bru-te vote thlakna hmun tur an la buatsaih loh thu an sawi a, "ECI aṭanga thu dawn kan neih phawt loh chuan hmalak theih a ni lo," an ti.