KHAWTHLIR

Thisen pe
ṬKP, Zemabawk Bial chuan ṬKP Coordination Committee, Aizawl ruahman angin nimin khan Aizawl Civil Hospital tan thisen unit 17 an pe a, petute mipa 16 leh hmeichhia pakhat an ni. Helen Lowry College NSS unit pawhin nimin khan Civil Hospital, Aizawl Blood Bank-ah thisen pek an huaihawt a, NSS volunteer mi pasarihin thisen an pe.

Training sawiho
Mamit DC Dr Lalrozama kaihhruaiin nimin khan DC conference hall-ah Core Team Meeting on Skill Development Framework an ṭhukhawm a; state páwna hnathawk, Covid-19 léng vanga haw (migrant worker) sorkara inhriattir mi 127 tana training buatsaih dan tur an sawiho. Vawk vulh training mi 20 tan leh cement mistiri training mi 40 tan buatsaih ni se an ti a, training-naa telte chu stipend pek an ni dawn.

Swab endikna thar
Health & Family Welfare department chuan, Muthi Community Hall chu Rapid Antigen Test hmanga Covid-19 swab sample endikna, Covid-19 Testing Mini Kiosk tih theihna hmun a nih thu a puang.

Loneitute zirtir
Agriculture Skill Council of India (ASCI) leh Indian Council of Agricultural Research (ICAR) bultumin Lengpui KVK chuan Mamit district-a loneitu thlan bikte tan chawlhkar khat awh skill training an buatsaih. Training-ah hian loneitute hnenah changpat leiṭha (vermi-compost) kg. 50 ṭheuh leh huan enkawlna hmanrua set khat ṭheuh an pe nghal a ni.

JJM training
State Institute of Rural Development & Panchayati Raj (SIRDPR) leh Water and Sanitation Support Organization (WSSO) chuan Jal Jeevan Mission hnuaiah nimin khan SIRDPR auditorium-ah ni 45 awh tur 'Skill Development Training Mason General & Plumber General (1st batch) under JJM' an buatsaih. Mason general (lung chher) training tur hian mi 300 leh plumber training turin mi 100 ziah luh a ni.