Politics tui nú kan hre ve ngai lo - Hawla

MPCC president Lal Thanhawla chuan, Congress party-in politics tui nú an hriat ve ngai loh thu leh politics chu ṭawngkam thiam apiang inbumna a ni tih an hriat ve loh thu a sawi.

Lal Thanhawla hian nimina Kawnpuia vantlang inkhawmah thu sawiin, "Politics tui nú hi kan party chuan kan hre ve ngai lo a, ṭawngkam thiam apiang inbumna a ni tih kan hre ve lo. Kan hotute'n kan ti ang tia an tiam chu mipui hmangin an tihlawhtling ṭhin. Pathianin min hùnna apiang hi kan hna a ni a, kan rinawm tur a ni," a ti.

MPCC President chuan, "NLUP kan tih khan mi khawsa theite a zawng lo a, Lal Isua'n mi tê ber a tihte kha a zawn chu a ni a, chuvangin a hlawhtling hle. Kan policy leh programme hi tih theih loh kan tiam tur a ni lo," a ti a; SEDP chungchangah, MNF hotupain, 'Chhungkaw tinin NLUP dawng tawhte pawhin cheng nuai thum in dawng vek dawn a ni,' a tih laiin, kum thum dáwnah pawh an la sem loh thu leh traffic jam awm lohna Aizawl khawpui leh kawng chhâwng siam tihte chu an nghahhlelh thu a sawi.

MNF sorkarin sorkar laipuia BJP a zawm thu sawiin Hawla chuan, "Central sorkar BJP hi chanchin ṭha hril kawnga a kalh zawnga khawsa an ni hlauh hi a pawi ka ti. Politics-ah hian kan dái sual palh chuan kan sakhua thleng hian a hlauhawm thei a ni. Zoram Kristiante hi zalen taka amah nena kan inpàwl theih nan kan ṭawngṭai a pawimawh hle a ni," a ti.

Lal Thanhawla chuan, Tuirial bialtu MLA thi ta Andrew H Thangliana chu mi fel tak a nih avangin a ui thu sawiin, a hmalaknate tihhlawhtlin a nih theih nan Congress party candidate vote turin mipui a sawm a ni.