SVEEP hnuaia hmalaknate thlirho

Aizawl District Core Committee of Systematic Voters' Education and Electoral Partici-pation (SVEEP) chu nimin khan Aizawl district additional DC Vanlalruati kaihhruaiin DC conference hall-ah an ṭhu a, hmalak tawhna leh hmalak meknate an thlirho.

Ṭhutkhawma tarlan danin, SVEEP hmalaknain e-EPIC awareness video leh online-a electoral roll form dilna application siam a ni tawh a, Special Summary Revision chungchang inhrilhtirna video chu DDK, LPS Vision leh ZONET Cable TV-ahte a remchan anga tihchhuah tum a ni.

Inthlan chungchanga video insiamsiak, auhla (slogan) phuah leh thuziak (essay)-a intihsiaknate buatsaih mek a ni a, thehluh hun tawp atan October 30, 2021 ruat a ni.

Aizawl district-ah Special Campaign Day atan November 5 ruat a ni a, chutah chuan SVEEP hnuaia intihsiakna hrang hrang lawmman sem a ni ang. Hemi ní vêk hian booth level officer (BLO)-te'n an bial chhunga rualbanlote chu an chennaah kalchilhin electoral roll form dahkhah, sawn, hming ziah diktir leh ṭul dangte an tihsak dawn bawk.