MNF sorkar hnâwl turin mipui ngen

Mizoram Pradesh Youth Congress Committee (MPYCC) chuan, Covid-19 lêng leh sum harsatna chhuanlamin MNF hruai sorkarin mipui harsatna hrang hrang a thlentir mek niin an tarlang a; sorkar chu sum leh pai enkawl thiam loah puhin, MNF sorkar hnâwl turin mipui an ngen.

MPYCC chuan, damdawi-ina awmte health care bill cheng vaibelchhe tam tak sorkarin a batsak thu te, sorkar hnathawk pension tawhte hnena sum pek tur tam tak sorkarin a hrênsak thu te, sorkar hnathawkte'n an hlawh aṭanga sum an khawl GPF pawh lak theih loha khàrsak an nih thu te, zirlaite scholarship sorkarin a pek chhuah theih loh thu te, contractor-te bill hrensak mek a nih thu te, India rama state zingah Mizoram chu state budget aṭangin Covid donaa sum hmang tlem filawr lak a nih thute an tarlang a ni.

Sorkar hnathawk, pensioner, zirlai leh contractor-te sum a hrensak chu pe chhuak vat turin Congress ṭhalaite chuan Mizoram sorkar an phût tih sawiin, "An party hamṭhatna tur ringawt ngaituah lo a, Mizoram mipui huapzo turin kan phut a ni," an ti.

MPYCC chuan, "Sum enkawl kawnga hlawhchham MNF sorkar hi mipuite'n hnâwl a, sum enkawl lama risk lak ngai lo, mithiamte pawhin an fak rawn ṭhin Congress party sum enkawl thiam sa thlang leh turin mipui kan sáwm tak meuh a ni," tiin, Tuirial bial by-election-ah pawh Congress candidate Chalrosanga Ralte vote turin mipui an ngen a ni.