ZPM candidate-in kawng laihsak tum

ZPM ṭhalaite chuan thuchhuah siamin, Tuirial bial by-election neih tura ZPM candidate Laltlanmawia chuan thlan tlin a nih chuan Thingdawl mipui tan Chemlui panna kawng a laih tlangsak dawn thu a sawi tih an tarlang.

ZPM Ṭhalai chuan, an party candidate Laltlanmawia'n thlan tlin a nih chuan Thingdawl mipuite Chemlui panna kawng a laihsak tur thu a sawi chu ṭha an tih thu sawiin, "Chemlui panna kawng hi laih tlang a nih chuan kut hnathawk chhungkaw tam tak tan chhenfakawm tak tur a ni dawn a ni," an ti.

Laltlanmawia chuan, Thingdawl khelmuala tui tling thei chu MLA-a thlan tlin a nih hunah changtlung zawka chei ṭhat a nih tur thu a sawi tih ZPM ṭhalaite chuan an tarlang a; Thingdawl khua tan NH aṭanga hmar lam field panna leh PS-I aṭanga veng chhung kalpawhna kawngpuiah lung a phahsak tawh a, Tlangnuam lama kawng chhia pawh a siamsak tawh tih an tarlang bawk.

ZPM Ṭhalai chuan, Laltlanmawia chu politics-a luhchilh hma aṭanga khawtlang tana hma la ṭhin a nih thu sawiin, "Bialtu MLA ni tur leh mipui tana rawngbawl tur pawhin candidate dang ṭha tak tak karah a fit ber a ni," an ti a; ZPM candidate thlang tling ngei turin mipui an ngen a ni.