INC candidate-in amah fiah turin mipui a ngen

Tuirial by-election neih tura INC candidate Chalrosanga Ralte chuan nimin khan Kawnpui VC-III Convoy Ground-a lawm luhna inkhawmah thu sawiin, "Tuirial bial aṭang hian Mizoram politics thar, kohhran leh mipui beisei mek a taka lan chhuahtir hi ka tum ber a ni," a ti a, amah fiah tur leh hna thawk theia siam turin mipui a sáwm.

Chalrosanga Ralte chuan, sum leh pai, nihna thlâkhlelh vanga politics khel a ni lo tih sawiin, "Tuirial bial aṭang hian Mizoram politics thar, kohhran leh mipuite beisei mek a taka lan chhuahtir hi ka tum ber a ni a, ram leh hnam tana ka thil tumte ṭha taka hlen chhuah hi hlawh tam tak aia ka ngaihhlut a ni," a ti.

Chalrosanga Ralte chuan, Tuirial bialtu MLA thi ta Andrew H Thangliana hmachhawp pawimawhte chhunzawma tipuitling ngei turin hmalak a duh tih sawiin, "Min thlan tlin chuan keimaha awm zawng zawng hi he bial tan hian a bo a bâng awm loin ka pe dawn a ni," a ti a; bial tana hna thawk theia siam tur leh amah chu fiah turin Tuirial bial mipui a ngen a ni.

Inkhawmah hian MPCC president Lal Thanhawla'n voter eng emaw zat Congress party-ah a lawm lut niin MPCC thuchhuah chuan a tarlang.