Covid-19 vangin mi 395 thi tawh

October 19, Thawhlehni tlai dar 5 aṭanga nimin tlai dar 5 thleng khan Covid-19 vangin mi pathum an thi. IDSP tarlan danin, nimin tlai dar 5 thleng khan Mizoramah Covid-19 vangin mi 395 an thi tawh a, chu'ng zinga mi 327 chu natna dang nei tel an ni.

October 19, Thawhlehni zan dar 10:07 khan Laiveti (80), Kawnpui Venglai chu Kolasib-a dedicated covid health centre (District Hospital)-ah a thi. Amah hi Covid-19 vei a ni tih October 11 khan hmuh chhuah niin, hemi ní hian DCHC-ah dah luh nghal a ni a; natna dang nei tel a nih thu sorkar thuchhuakin a tarlang.

Nimin zing dar 5 khan Lalmalsawma (48), Kanhmun, Mamit district chu Mamit DCHC-ah a thi a, natna dang nei tel a ni. Hripui vei a ni tih October 17 khan hmuh chhuah a ni a, DCHC-ah dah luh nghal a ni.

Lalawmpuia (55), Kolasib pawh nimin zing dar 6:30 khan State Referral Hospital-ah a thi. Covid-19 positive a ni tih October 6 khan hmuh chhuah a ni a, October 8 aṭangin SRH-ZMC-ah enkawl a ni.