Green Mizoram Day hman a ni

Nimin kha Green Mizoram Day vawi 22-na a ni a, Mizoram hmun hrang hrangah hman niin, thing ṭiak eng emaw zat phun a ni. Kumina thupui chu 'Tun hi thing phun hun chu a ni' tih a ni.

Aizawlah chuan Raj Bhavan hung chhungah Governor PS Sreedharan Pillai hoin thing ṭiak phun a ni a, a nupui Reetha Sreedharan-i'n a phun ve bawk. Raj Bhavan hung chhungah hian thing puitling eng emaw zat a la ding a, tun hnaiah sahuai pakhat lutin, a ngampa hle a, ṭha taka humhalh a ni.

Mizoram sorkar General Administration Department chuan June 8, 2020 khan thuchhuah siamin, Covid-19 hripui lêng leh inkhàrkhip lai a nih avangin kumina Green Mizoram Day chu state leh district-ahte inkhawm buatsaih loh turin a ti a; chutih rualin, sorkar office leh zirna-inte thing ṭiak panga tal phun tura hriattir an ni.

Green Mizoram Day hi kum 1998-ah Green Aizawl tih hming púin hman ṭan a ni a, kum 1999 aṭangin ‘Green Mizoram’ tih a ni. Green Mizoram Day progarmme hmangin nikum thleng khan thing ṭiak 16,46,289 phun a ni tawh a, mimal leh páwl hnenah thing ṭiak 22,35,963 sem chhuah tawh a ni bawk a; a vaiin thing ṭiak 38,82,252 a ni.

Green Mizoram Day-ah hian City Forest, Hlimenah Environment, Fo­rests & Climate Change (EFCC) department buatsaihin EFCC minister TJ Lalnuntluanga leh Aizawl South-III bialtu MLA Prof. F Lalnunmawia te hoin hun hman a ni a, thing an phun.

EFCC Minister chuan, ramngawte chu khawvel tan chuap ang a nih thu sawiin, "Kan hripui do mek do hneh dan ṭha ber chu taksa tihchak a ni a, taksa chak tur chuan boruak thiang­hlim a pawimawh a, boruak thianghlim nei tur chuan thing phun belh zel a ngai a ni," a ti.

Green Mizoram Day pual hian chief secretary Lalnunmawia Chuango pawhin New Capital Complex-ah tlaizawng a phun a ni.

Lungleiah chuan district forest officer Lalrammawii Sailo hoin High Tech Nursery, Pukpuiah thing ṭiak eng emaw zat an phun a; an district hmun hrang hrangah social distancing kalpui chungin Green Mizoram Day pualin sorkar office, in leh a chhehvelahte leh huanahte thing ṭiak eng emaw zat phun a nih bakah, thing phun tawh sa hmunhmate tihfai a ni bawk.

Champhai district-ah pawh hmun hrang hrangah Green Mizoram Day hman niin, thing ṭiak eng emaw zat an phun. Environment, Forest & Climate Change department kaihhruainain YMA sub-headquarters ram Mualbuhvum, Zote kawngah thing phun a ni a, mi 63 vel an thawk chhuak. Nikuma tlaizawng ṭiak 428 an phunna hmunte an tifai nghal.

Police-te pawhin SP Rex Zarzoliana hoin SP office chhehvel leh SP quarters bul velahte thing an phun a; Champhai District Hospital chhehvelahte Health department-a thawkte'n an phun bawk. Champhai district-ah hian thing 

ṭiak 2,590 an sem chhuak a ni.

Kolasib-ah chuan zing karah Kalvari Home, TNT Centre-ah bawrhsap Dr H Lalthlangliana hoin sorkar official-te'n thing an phun. Kolasib-a sorkar department leh pawlte hnenah EFCC office aṭangin thing ṭiak 311 pek chhuah a ni a; EFCC leh Agriculture department hnuaia FOCUS-te'n khaw 12-ah thing ṭiak 1,200 an phun bawk.

Serchhipah chuan District Committee on Green Mizoram chairman Dr Lalzirmawia Chhangte leh SP R Sathya­sundaram hoin sorkar official-te'n Serchhip leh Thenzawl inkar kawngpui kamah thing ṭiak 32 an phun a; an district pumah 520 phun a ni.

Dr Lalzirmawia chuan, thing leh maute chu mihringte nen thûk taka inlaichin an nih avangin a awm sate humhalh bakah, neih belh tura tihpun zel a pawimawh hle thu a sawi a, "Kum­ina Green Mizoram Day thupui 'Tun hi thing phun hun chu a ni' tih a nih ang leh Bible-ah pawh 'Phun hun a awm' tih kan hmuh angin, a phun hun lai hian a thei apiangte'n mahni remchanna hmunah i phun ang u," a ti.

Lawngtlaiah chuan district bawrh­sap Shashanka Ala, SP Amit Goel leh LADC-a executive secretary H Lalramenga leh sorkar official-te'n Bethel Prayer Mount-ah thing an phun. Lawngtlai district-ah hian LADC-a EFCC department chuan thing ṭiak 750 an sem chhuak a ni.