Hripui vei hmuh thar 61 zingah Tualchhunga kái mi 56 an awm
November 10, Thawhlehnia Mizorama Covid-19 vei hmuh chhuah mi 61 zingah Mizoram chhunga kái chhâwng (local positive contact) mi 56 an awm. Hetih lai hian, hmuh thar zingah hri kài ṭanna hriat loh leh natna lang chhuak (symptom lang) an tlem tial tial thung.
Hripui vei hmuh thar, tualchhunga kái mi 56-te chu Aizawl khawpuia veng pasarih leh Aizawl páwn lama khaw pathuma mite leh, Aizawla quarantine facility pakhata duty-te an ni a; IPR department-in nimin zinga an tarlan laia chanchin la hriat chian theih loh mi paruk an awm.
Mizoram chhunga kái mi 56 zingah hian kai ṭanna hriat theih loh chu pahnih chiah an ni a; Covid-19 symptom nei pawh mi panga chiah an awm a ni.
Mi 56 zinga 16 chu Dinthar venga mi niin, mipa paruk leh hmeichhia 10 an ni a; an zingah hmeichhe nausen thla 11 mi pakhat, hmeichhia naupang kum 3, 6 leh 8 mi te, naute mipa kum 1 mi te, kum 60 chung lam pahnih an tel. Chhungkuaa hripui vei tawhte aṭanga kái an ni tlangpui a; mipa naute kum 1 mi chu amah enkawltuin hripui a vei vanga Durtlang BSUP CCC-a lut ve, CCC-a a luh hnua endik nawnnaa hmuh chhuah a ni.
Lawngtlai Council Veng (Dinthar Veng)-ah pawh hripui vei 16 hmuh chhuah a ni a, an zingah nausen thla 8 mi pakhat, naupang kum 11 hnuai lam paruk an tel a ni.