Rél hmanga Chennai aṭanga hawte Chhui zui mek an ni - Health Minister

Health & Family Welfare minister Dr R Lalthangliana chuan, Covid-19 lockdown vang­a tangkhang Chennai aṭanga rawn hawte chu an swab sample endik turin chhui zui mek an nih thu a sawi.

Covid-19 hripui lên chhunga mipuite'n rilru hrisel an neih theihna tura din Committee on Covid-19 Psychological & Social Guidance leh Mental Health on COVID-19 team-te nen nimina a pisaa an inkawmnaah Minister chuan, "Chennai aṭanga lo haw, quarantine hun hmang zoa chhuah tawhte chu fimkhur thu hlaah swab sample laksak a, RTPCR-a test turin a chhui mek a ni a, a chanve vel zawh a ni tawh," a ti.

Dr R Lalthangliana chuan, thu belhchian dâwl lo leh thuthang léngvâk, mipui tichiai thei theh­darh lo turin mipui an insùm a ngaih thu sawiin, "Chennai aṭanga lo hawte chungchangah sorkarin a tih tur a hria a, sorkar hmalakna a rintlak tâwk a ni," a ti a, thlaphâng lo turin mipui a chah.

Health Minister chuan, hripui­in Mizoram a delh rih tak tak lai nia a lan thu sawiin, "Hetih rual hian, Covid-19 vei kan neihte dinhmun ngaihtuahawm lutuk an awm rih lo a, rei lo têah an dam thuai a beiseiawm. Kai thar erawh kan la neih reng hmel thung," a ti a, mipui leh khung hran mekte'n rilru hrisel leh hahdam an neih a pawimawh thu a sawi.

Covid-19 vanga thla thum chuang nunphung a khaihlak chhûnga Mizoram mipui, pawl, task group, sorkar hnathawk, task force leh ZMC laboratory-a thawkte an hah hle tih sawiin R Lalthangliana chuan, "An thawhrimna leh inpekna zawng zawngah lawmthu ka sawi. Covid-19 hi ze danglam tak nei a ni a, hmachhawn dan pawh thiam a har. Kan hmalakna hrang hrangah tihsual palh leh mipui leh pawlte duhthusam leh beisei kan phâk lohna tam tak a awm ang tih ka ring a, inhriatthiamna leh ngaihdamna ka dil a ni," a ti.

Committee on Covid-19 Psychological & Social Guidance leh Mental Health on Covid-19 team member-te chuan, sorkar quarantine facility leh community quarantine facility-te an tlawh ṭhin thu te, khung hran mekte hnenah a huhoin counselling an tih ṭhin thu te, a mamawh zualte chu a mala an kâwm fàl ṭhin thu te, mipui zirtirna TV show, thuziak leh poster an siam ṭhin thute an sawi a ni.