Kawngpui danah inrawlh vat turin Lal Thanhawla'n PM Modi a ngen
National Highway-306 kawngpui Lailapur, Assam-a dan a nih chungchangah Mizoram Pradesh Congress Committee (MPCC) president Dr Lal Thanhawla chuan nimin khan prime minister Narendra Modi hnenah lehkha a thawn a; NH-306 kawngpui dan mekah a rang thei ang bera hma la turin a ngen.
MPCC President chuan, India ram hmun dang aṭanga Mizoram châk lâkna kawngpui ber, Cachar district, Assam-a NH-306 chu mi awm ṭha duh lo ṭhenkhatte'n ni 10 chuang an dan tawh thu ziakin, kawngpui dan a nih avangin Mizoram economy-in nasa taka a tawrh tawh thu a tarlang.
Dr Lal Thanhawla chuan, kawngpui dan pin reng a nih chuan Mizoram mipui chu dinhmun chhe lehzual hmachhawn thei reng an ni tih sawiin, "Kawng dan pin hian Covid-19 hripui léng vanga mipui tawrhna a tizual hle a ni," a ti.
Ramri-ah boruak pangngai a awm leh thuai theih nan a rang lama inrawlh turin Lal Thanhawla chuan PM Narendra Modi a ngen a; state pahnih inkal pawhna tluang taka hawn a nih theih nan sorkar laipuiin hma a lâk a, Assam sorkar hnenah hriattirna pe tura a beisei thu a sawi.
Dr Lal Thanhawla chuan, kawngpui dan reng chuan Mizorama ṭhangtharte rilruah India ram aṭanga inlâk hran duhna rilru a tuh thar leh a hlauhawm thu a ziak bawk.