Mizoramah medical college din turin Sorkar laipuia MHFW-in phalna a pe

State Referral Hospital behchhana Mizoram sorkarin medical college din a tum, Mizoram Institute of Medical Education & Reseach (MIMER) chu Medical Council of India (MCI)-in a pawm hnuah sorkar laipuia Ministry of Health & Family Welfare (MHFW) pawhin a pawmpui a, May 22, Thawhlehni khan medical college din phalna, Letter of Permission a tichhuak.

MIMER hotute hnen aṭanga thu dawn danin, MHFW-in MIMER din phalna a pekna thu, Letter of Permission (LoP) hi May 22, 2018 khan MHFW Commissioner & Secretary chuan a tichhuak a; chutih laiin, a hmingah hian 'Mizoram Institute of Medical Sciences' tia ziah a ni thung.

MHFW Commissioner & Secretary-in LoP a tichhuahah hian, MIMER chu MCI-in a dilpui (recommend) angin Indian Medical Council Act, 1956 Section 10-A tlawhchhana phalsak a nih thu te, 2018-19 academic session aṭanga class ṭan tur a nih thu te, a bul ṭan nan MBBS zir tur zirlai 100 lak phalsak a nih thute ziah lan a ni.

MHFW LoP-ah hian MIMER-in a tih tur ṭhenkhat tarlan nghal a ni a; MCI norms angin MIMER chu medical college ruhrel (infrastructure), bungrua leh hmanrua, teaching staff leh non-teaching staff, building leh a behchhan damdawi-inte changtlung tak nei tura tih a ni. State sorkar enkawl medical college-te chu a mamawh ang ang state sorkarin a ngaihtuah tur a nih thu te, MBBS seat zinga 15% chu All India Quota atan dah tur a nih thute a chuang bawk.

MIMER hotute chuan, MIMER din a nih theih nan hian sorkarin theihtawp a chhuah tih sawiin, "MCI lamin ṭum thum an rawn endik a, a vawi thumna, April 4, 2018-a an endik leh hnuah an pawm ta a ni," an ti. MCI hian MIMER hi May 3, 2018-ah a pawm a, MHFW-ah MIMER din phalna pe turin recommendation a thawn a ni.

MIMER hotute chuan Vanglaini palai zawhna chhangin, MIMER-a lut turte chu NEET paltlangte chauh an nih dawn thu sawiin, "Medical college ṭhenkhat chuan NEET bakah a hranpain entrance test an nei leh ṭhin a; keini chuan a hranin test kan nei dawn lo a, NEET hi kan ring dawn," an ti.

Kum 2018-19 academic year-a MBBS zir tur lak chungchanga sorkar laipui lamin ruahmanna a siam dan chuan, entrance exam (NEET) May 10, 2018-a neih tawh result chu June thla chawlhkar khatnaah tihchhuah tur a ni. NEET-a tlingte tana counseling neih a ni ang a, a pumpui thua MBBS zir thar tura zirlai thlante'n college an zawm hun hnuhnung ber tura ruahman chu August 31, 2018 a ni.

MIMER-ah hian kumin August thlaah class ṭan tum a ni a; a bul ṭan nan subject pathum - Anatomy, Physiology leh Bio­chemistry-ahte class ṭan a ni ang.

MIMER-ah hian director chu Prof. L Fimate a ni a; tun dinhmunah hian teaching faculty 74 an awm. Teaching faculty awm dan chu - professor pathum, associate professor pali, assistant professor 28, semnior resident doctor pariat, junior resident doctor 17 leh demonstrator 14 a ni. Teaching faculty hi mamawh zat a la tling lo a, tuna awm tawhte hi mamawh zat aṭanga 75% vel a nih thu, MIMER hotute chuan an sawi.

MIMER-a MBBS zir turte fee chung­changah thutlukna a la awm lo a, Mizoram sorkar chuan sorkar laipui duh dan angin fee bithliahtu tur Fee Fixation Committee a din tawh. Fee Fixation Committee-ah hian chairman chu high court judge retired a ni tur a ni a, Mizoram sorkar chuan chairman atan Justice T Vaiphei a ruat a ni.

MIMER hotute chuan, state danga medical college-te dinhmun nena ngaihtuahin, MIMER atan hian kum khatah cheng vbc. 40-50 vel sên a ngai tura an rin thu an sawi bawk.