Vawiinah Vice President a lo zin dawn

Vice President M Vankaiah Naidu chuan vawiin hian Mizoram a rawn tlawh dawn a, Mi­zoram University-a hun a hman zawhah Mi­zoram a chhuahsan leh nghal ang.

Ruahman dan chuan, Vice President hi Lengpui Airport aṭangin helicopter hmangin zing dar 9:30 velah Ṭhuampui Helipad-ah a ṭum ang a, helipad aṭangin motor-in MZU a pan ang. Chawhma dar 10:30-ah MZU-ah building a hawng ang a, chhun dar 12-ah MZU chhuahsanin Raj Bhavan a pan ang a, chawchhun a ei hnuah Mizoram a chhuahsan leh nghal dawn a ni.

Vice President a rawn zin dawn avang hian Tra­ffic SP H Ramthleng­liana chuan thupek chhuah­in, vawiina Aizawl khaw­puia lirthei tlân dan tur tihdang­lam a nih thu a tarlang.

Ruahman dan chuan, May 24 zing dar 6 aṭanga tlai dar 5 inkarah kawng­pui sirah lirthei reng reng dah phal a ni lo. Ṭhuampui Helipad péng aṭanga Mizoram University inkar - Bawngkawn, Eden­thar Veng, Hunthar veng, Company pêng, Vai­vakawn, Ramrikawn te; MZU aṭanga Raj Bhavan inkar - Vaivakawn, Temple Square, Tennis Court leh, Raj Bhavan aṭanga Ṭhuampui Helipad inkar - Treasury square, Zodin Square, Dawrpui, Zarkawt, Chanmari, Chaltlang, Bawngkawn kawngahte kawngpui sirah lirthei reng reng dah/hûn khap a ni.

Traffic SP chuan, Vice President a lo zin dawn vanga ruahmanna siam hi hrethiama zâwm turin mipui a ngen a, "Zing dar 6 aṭanga tlai dar 5 inkar­ah kan sawi tâk kawng­puiah lirthei duh ang angin a tlan theih dawn lo a, tum lohna lamah intlantir a ngaih cháng leh rei deuh tak indintir a ngaih hunte pawh a awm dawn avangin, a chunga tarlan kawngpuiahte hian lirtheite hmang tam lo tura inhmakhua lâwk turin kan inngen a ni," a ti.