Ramdinmawii thih thuah a kawppui an man

May 22, Thawhlehni zan thimhlim khan Ram­dinmawii (41) d/o Sap­thanga, Armed Veng South chu Zonuam, Ai­zawla in pakhatah thia hmuh a ni a, a kawppui Lalchhuanmawia (50), Zonuam chu rinhlelh thil­ah police-in an man nghal.

Thu dawn danin, Lal­­chhuanmawia hian a nu­pui fanaute a kalsan a, man leh mual inhlan awm lem loin Ramdinmawii nen an inkawp a; Aizawl By-Pass Road-a quarry-ah te leh hmun hrang hrangah an awm kual ṭhin. May 20, Pathianni khan Zonuama Vanzika te in hnuai ber, Lalchhuanmawia u fapa tlangval in a luahah kalin an awm zui a ni.

May 22, Thawhlehni khan in neitu (luahtu) tlangval chu a hnathawhna lamah a kal a, tlaia a hawa in chhung sekrek a khawih fel hnua mut pindana a luhin a patea te awm dan chu a hmu a, mi dang a hriattir nghal a ni.

Zonuam YMA hruai­tute'n zan dar 7:30 velah thil thleng an hria a, in chhung an luh chuan Ram­dinmawii chu a lo thi tawh a ni. A ruang bulah Lal­chhuan­mawia a awm a, a rûi hlea hriat a ni. Ram­dinmawii hi kutthlak ni ngeia hriat a ni a; a hmai a duk a, a tuk­khum a dûp deuh bawk.

He thil thleng chung­changah hian MHIP gene­ral headquarters chuan thuchhuah siamin, "Ram­dinmawii, a pasal Lal­chhuanmawia, Zonuam-in ni 22.5.2018-a râwng taka a that hi na kan tiin pawi kan ti em em a, tun hnuah hetiang thil rapthlak hi thleng leh tawh lo se kan duh tak zet a ni," an ti a; tualthattu chu danin a hrem theihna sang bera hrem turin thuneitute an phût thu an tarlang.