ZPM CM candidate-ah kan lungrual - Vanlalhlana

Ṭangrual pawl, Zoram Peoples' Movement (ZPM) chuan May 22, Thawhlehni zan khan Champhai Venglai YMA Hall-ah vantlang inkhawm an buatsaih a; ZPM thu­puangtu Vanlalhlana'n thu sawiin, ZPM chu an chief ministerial candidate turah an lungawi thu leh an lungrual thu a sawi.

Vanlalhlana chuan, ZPM CM candidate atana Val Upa Council-in an ruat Lalduhoma chu ṭangrual pawla tel pawl hrang hrangte'n lungrual taka an pawm thu a sawi a, "Chief minister nih tum dangte nena khaikhinin, Mizoram tan a ṭha ber ang tih kan chiang a ni," a ti.

MPC vice president Vanlalhlana chuan, ZNP leh MPC an thawhho ṭhinah leader atan Brig. T Sailo chu Lalduhoma'n thinlung taka a pawm ṭhin tawh thu sawiin, "Val Upate'n ZPM house leader atana an ruat hi MPC mipuite phei chuan pawm a, theihtawp chhuaha ṭawiawm hi kan tihmâkmawh a ni," a ti a; Brig. T Sailo thlarau zah vang tal pawhin MPC tan chuan Lalduhoma ṭawiawm chu an bat a nih thu a sawi.

ZPM CM candiate Lalduhoma chuan, "CM candidate atana Val Upa Council-in leader-a min ruat hi ka lawm rualin, ka huphurh tak zet a, Val Upate'n min uap tlat dawn avang leh, thawhpui ṭha tak tak ka neih dawn avangin huaisen takin ka pawm a ni. ZPM hian sorkar kalphung tur duan sa a nei a, chumi anga hna thawk tur chuan kan inring tâwk. He kalphung thar hi mipui tan eng ang fakaua ṭha nge a nih enchhin turin Mizoram mipuite ka sáwm a ni," a ti.

ZPM general secretary K Sapdanga pawhin thu sawiin, ZPM chuan lungphûm 'I ram, i hnam leh i sakhua humhim la, hmasawnna hna thawk rawh,’ tih an neih thu a sawi a, "Hmasawnna hna te, retheihna ûmbo hna te, thuneihna hrim hrimte hi ram leh hnam, sakhua humhimna atana hmanrua a ni tih hi ZPM pawm dan a ni," a ti.

K Sapdanga sawi danin, ZPM sorkarah chuan VIP langsar bik an awm dawn lo a, CM pawhin motor pakhat chauh a kawl ang a; portfolio (department enkawl bik) a nei dawn lo a, council of minister-te hna thawh dan a vil dawn a ni.

ZPM hruaitute hian nimin zing khan Khaw-zawl Bazar-ah vantlang inkhawm buatsaihah thu an sawi leh a ni.