Police officer ardali leh motor la kawlte kan chhui zui mek - DGP

Director General of Police (DGP) Balaji Srivastava chuan, police officer pension tawh zinga ṭhenkhatin police ardali (orderly) leh motor an la kawl zui zel chungchang chu an chhui zui mek thu a sawi a, "Police officer-te'n an naute an chhawr ṭhin chungchang pawh kan hria," a ti.

Nimina thuthar thehdarhtute nen a pisaa an inkawmnaah Vanglaini palai zawhna chhangin Balaji Srivastava chuan, "Police officer pension tawh ardali leh lirthei la kawl an awm tih hi chanchinbuahte ka lo hmu a, list kan la khawm mek a, kan la lêt leh ang," a ti a; a ṭul anga hma la tura an inbuatsaih mek thu a sawi.

Balaji Srivastava chuan, kum 1993-1995 chhungin Mizoramah a awm tawh thu sawiin, "Tun ṭuma ka rawn lêt hnuah hmun hrang hrang ka fang kual a, police-te'n an thawk ṭha hlein ka hria. Dan leh thupek kenkawh chungchangah ziak leh chhiar thiam in tam hi in advantage a ni a, mipuite'n dan leh thupek an zâwm ṭha viau," a ti.

DGP chuan, Mizorama a awm chhungin police welfare leh police tihhmasawn chu a ngaih pawimawh tur a nih thu sawiin, "Officer leh an naute inkar a zau lutuk tur a ni lo a, inpuih tawn tur a ni. Constable-te hi kan chakna an ni a, an tih ṭhat chuan police an hmingṭha a, an tihchhiat chuan police an hmingchhe ṭhin," a ti a, ṭha taka thawhho a pawimawh thu a sawi.

Police tihchangtlunna turin sorkar laipui leh Mizoram sorkar aṭangin sum an dawn ṭhat thu sawiin DGP chuan, "Tun hnaiah pawh motor eng emaw zat lei thar a ni. Hengte hi unit hotute tan ni loin, police station tan a ni. Hmasawnna tur atan theihtawp kan chhuah zel a, thil tih chhung a rei duh a, chutih rualin, inbuatsaihna ṭha neih a ngai. Inbuatsaihna a ṭhat chuan a rei deuh pawhin a reh kan seng dawn a ni," a ti.

Balaji Srivastava chuan, police zingah ruihhlo bawiha táng an tam tih sawi a awm ṭhin chungchangah, "Unit tin aṭangin a list ka dil a, 10% pawh an ni hlawm lo. SP leh commandant-te chu ruihhlo bawiha tángte hi ṭha taka enkawl turin ka hrilh. Kan mi leh sate an ni a, siamṭhat hna thawh ka ngai pawimawh," a ti a; inhrem ringawt chu insiamṭhatna a nih loh thu a sawi.

DGP ṭawiawmtu AIG-I Lallian­mawia chuan, DGP-in venhimna thilah zan lamah khawpui tihên ṭhat pawimawh a tih avangin, Aizawl Municipal Corporation Mayor hnenah zan lama khawpui a ên ṭhat theihna atana hma la tura ngenna a thawn thu a sawi a ni.