KHAWTHLIR

Bonsai Show
Bonsai Association of Mizoram (BAM) chuan a ṭum thum nan nimin khan Assembly Annexe building-ah Bonsai Show an buatsaih ṭan a, vawiin leh naktukah chhunzawm a ni ang. Show-ah hian stall 15 a awm a, Bonsai 71 pho chhuah a ni a; ni tin chawhnu dar 1-3 inkarah Bonsai live demonstration neih ṭhin a ni.

Motor chesualah thi
May 22, Thawhlehni chhun khan Lunglei district-a Ṭhangte khaw daiah pick-up a chesual a, motor-a chuang zinga mi Helen Lalramfawni d/o J Lalzara, Ṭhangte a thi. Thu dawn danin, Lalramfawni hi pawl 12 pass thar a ni a, an khua Ṭhangte-a pass lawm tura a ṭhiante nena an kal chu an khaw thlen hmaah an chesual a ni.

Tualthahna dem
Armed Veng South Local Council, YMA, MHIP leh MUP-te chuan thuchhuah inṭâwm siamin, an veng mi Ramdinmawii (41) d/o Sapthanga, May 22-a a pasal Lalchhuanmawia, Zonuam, Aizawlin a sawisa hlum chu an dem thu an tarlang a; Lalchhuanmawia chu a phu tâwk hremna pek a nih theihna atan theihtawp an chhuah zel dawn thu an sawi.

Drone khap
Aizawl SDM chuan thupek chhuahin, May 23-25 chhungin Aizawl khawpui chhung, Raj Bhavan, Ṭhuampui Helipad, Mizoram University leh Lengpui leh a chhehvel remote control hmang drone/aerial camera leh hetiang lam chi reng reng thlawhtir a khap a, "Thupek bawhchhia an awm chuan an drone man emaw kah thlaksak a ni ang," a ti. Thupek hian police, sipai leh district magistrate-in phalna a pekte a huam lo.

Start-Up sawiho
Mizoram Start-Up Movement chungchangah nimin khan Governor Lt.Gen. Nirbhay Sharma kaihhruaiin Raj Bhavan-ah thuneitute an ṭhukhawm a; May 11, 2018-a an thurel tawhte bawhzui dan an thlirho a, sorkar hotute'n zirna-in sang zawkte tlawh kuala an dinhmun an zirchian thu tarlan a ni.