Lungleiah Youth Summit & Road Show

Mizoram Youth Commission (MYC) chuan nimin khan Lungleiah Youth Summit & Road Show 2018 an buatsaih a, chief minister Lal Thanhawla'n a hawng. MYC hian Youth Summit & Road Show 2018 hi Aizawlah ṭanin, district khawpui hrang hrangah an buatsaih tawh a, Lungleia an buatsaih hi a hnuhnung ber a ni.

Chief Minister chuan, Mizoram hmun hrang hranga ṭhalaiten MYC hmalakna an hriat a, skill development lama ṭhalaite hmasawnna tur thil ṭulte inhrilhhriatna leh zirna leh eizawnna lam inkawhhmuhna hun buatsaih a ni chu lawmawm a tih thu a sawi a, "Youth Sum­mit hi a hlawhtlinna chu tlawhtu tam lamah chauh ni loin, a chhimtute'n an kal zelnaah, an zirna leh eizawnna atan an hman ṭangkai danah a innghat dawn a ni," a ti.

Mizoramin hmasawnna kawng a zawhnaah innghahna ṭha leh hnianghnar a neih chu human resource a ni tih sawiin Lal Thanhawla chuan, "Ṭhalaite'n hma an sawn theih nan ṭhalaite khawvel siam hmang chu sorkarin a ngai pawimawh a, infiamna lamah infrastructure ṭha tak tak siam a ni tawh a, hmang ṭangkaitu pawh an tam a, infiammi chhuan­awm leh thleng sang tak tak Mizoramin a nei tawh a ni," a ti a; zirna lamah pawh khawvel el phak quality education siam tumin kawng hrang hranga hmalak a nih thu a sawi.

Chief Minister hian MYC Incentive Cash Award Scheme, college exam-a gold medalist-te leh UPSC leh sorkar laipui hnuaia competitive exam hrang hranga inziak tlingte hnena pek a sem nghal a ni.

MYC chairman Joseph Lalhimpuia pawhin thu sawiin, Mizo ṭhalaite hmakhua thlir chungin Youth Summit & Road Show buatsaih a nih thu a sawi a, "Ṭhalaite tan khawvel thar siamnaah ṭhalaite khawvel zauh a ngai tih hriain MYC-in kawng hrang hrangin hma a la a ni," a ti.

Joseph Lalhimpuia chuan, IAS online coaching leh SSC coaching siam a nih thu te, ṭhalaite tana mi entawn tur thlanna Young Achiever Award buatsaih a nih tur thu te, incentive award atan cheng nuai 33 dah a nih thu te, Indian Air Force commando lak turah diltu mi 3,000 chuang zingah MYC-in dil ve turin Mizo ṭhalai 19 a tir a, mi 85 lak zingah Mizo pahnih an tel thu te, Indian Army-a chaplain post ruak chu Mizoin an hnawhkhah theih nan hmalak mek a nih thute a sawi bawk.

MYC Chairman hian Lung­lei district chhunga mi, kum­in HSLC leh HSSLC topper pathum hnenah lawmpuina MYC-in a buatsaih a hlan nghal a ni.

Youth Summit & Road Show-ah hian skill development leh zirna leh ṭhalai lam kaihhnawiha hmalâkna nei sorkâr department hrang hrangte leh private firm eng emaw zatin stall 51 an hawng a; a tlawhtute'n an hriat duhte an hrilhfiah zel a ni. Youth Summit & Road Show hi vawiinah chhunzawma zawh a ni ang.

MYC chuan Youth Summit & Road Show hi April 17-ah Aizawlah an ṭan a, April 24-ah Kolasib-ah, April 27-ah Mamitah, May 4-ah Champhaiah, May 9-ah Serchhipah, May 15-ah Siaha leh May 18-ah Lawngtlaiah, May 23-24 ah Lungleiah an buatsaih leh a ni.