Gas leh tuialhthei chungchang sawiho

Food, Civil Supply & Consumer Affairs (FCSCA) minister John Ro­tluangliana chuan May 22, Thawhlehni khan Silchar Mizoram House-ah Indian Oil Corporation (IOC) hotute a kawm a, gas leh tuialhthei chung­chang a sawipui.

John Rotluangliana chuan, LPG bikah Mizoram tan distributor an tlem thu a sawi a, "A bikin Aizawl khawpuiah distributor 12 chauh an awm a, hei hian mipui mamawh a phuhru zo lo a ni," a ti a; IOC hotute chu distributor tam zawk an awm theih nan hma la turin a hrilh.

IOC hotute chuan, FCSCA Minister thu sawi chu an bawhzui tur thu sawiin, tun dinhmunah Durtlangah LPG distributor tur dan angin an thlan tawh thu leh physical/site verification an neih mek thu an hrilh.

MIzorama LPG supply hnianghnâr zawka a awm theih nan ṭan an lak thu sawiin IOC hotute chuan, "May 22 khan Borkhola aṭangin LPG phur truck trip 13 leh Mualkhang aṭangin truck trip 11 Mizoram tan thawn chhuah a ni," an ti.

Tuialthei chung­changah John Rotluang­liana chuan, "Mizoramah oil depot kan nei lo a, retail outlet chauh a awm avangin tuialhthei hi ni 2/3 lek daih dah khâwl theih a ni," a ti a; chhan hrang hrang vanga ni 2/3 vel Mizorama POL phur luh a nih loh chuan mipuite'n harsatna an tawh nghal ṭhin thu a sawi bawk.