Jampui Mizote leh MNF hotute inkâwm

Jampui Mizo Convention (MC) huaihawtin nimin khan Eden Tourist Lodge, Vanghmun, Tripura-ah MNF general headquarters hruaitute leh Jampui tlanga tlawmngai pawl hrang hrang hruaitute an inkawm a; MNF vice president Dr R Lalthangliana chuan, ram hrang hranga awm Mizote rorelna pakhat hnuaia an awm theihna atan MNF-in hmalak zel a tum thu a sawi.

Dr R Lalthangliana chuan, Mizo nationalism chu state leh international boundary-in a ṭhen hrang thei tih sawiin, "Eng emaw vangin Zo fate ṭhen hranin kan awm a, kan thinlungah erawh ram khat kan ni. Zo fa hmun hrang hranga ṭhen darha awmte rorelna pakhat hnuaia awm theihna tura hmalak hi MNF dinna a la ni reng," a ti.

Tuipuibari kawng lam aṭanga Jampui tlang pawhna kawng kal theih loa a chhe zo ta chu pawi a tih thu sawiin R Lalthangliana chuan, "Jampui Mizote'n harsatna in tawh hrang hrangte hi kan hre ve ṭhin. Ram leh hnam thil tak taka Zo fate'n harsatna an tawhin khawi hmuna cheng pawh ni se, anmahni kianga ding turin MNF hi a inpeih a ni," a ti a; MNF chu hmun hrang hranga Mizote pui turin a tlan­chhiat ngai dawn loh thu a sawi.

MNF Vice President chuan, Mizorama MNF kum 10 a sorkar chhungin hmasawnna tam tak an kalpui tih sawiin, "Chutih rualin, tih dik loh leh tih fuh tawk loh eng emaw zat kan nei tih kan pawm a, kan tih loh tur kan tih avang leh kan tih tur kan tih loh vanga Zo fa, hmun hrang hranga awmte rilru kan tihnatnaah ngaihdam kan dil a ni," a ti.

Inkawmhona hi Jampui Mizo Convention treasurer J Ngurdinliana'n a kaihruai a ni.