Tualthattu dam chhung táng turin hrem

Nupui thattu C Lalnunkima, Ngopa Field Veng chu dam chhung­a hrehawm taka jail-a táng tur leh Rs. 5,000 chawi turin Champhai district-a additional sessions judge R Vanlalena court chuan nimin khan a hrem.

Champhai police aṭanga thu dawn danin, C Lalnunkima leh a nupui Rosy Khawltawichiangi chu July 15, 2017 khan an ṭhiante nen Ngopa aṭangin Mimbung panin an kal a, Ngopa an pelh tawh hnu motor-a an chuan laiin C Lalnunkima te nupa chu an inhnial a ni. An inhnial buai hnuah C Lalnunkima chuan a nupui chu kut a thlak a, motor a din hnuah chuan motor aṭangin a hnûk thla a, a chhir zui a ni.

Rosy Khawltawichiangi chu nikhaw hre loin a awm zui a, chuvang chuan Ngopa lamah lêt lehin, an inah hruai a ni. An ṭhenawmte ngaih a ṭhat loh avangin damdawi-inah an hruai a, damdawi-in an thlen chuan a lo thi tawh a ni.

Thil thleng hi police-in an chhui zui a, an thil hmuhte leh thuhretute thu sawi a zir chian hnuah Court chuan thutlukna siamin, C Lalnun­kima chu dam chhunga táng tur leh Rs. 5,000 chawi turin a hrem ta a ni. Court chuan mitthi chhungte'n dan anga zangnadawmna sorkar aṭanga an hmuh theihna tura hma la turin thuneitute a hriattir nghal bawk.