Phainuam nuho chêt dan an chhuang

MHIP General Head­quarters, ZPM Zonu Headquarters leh MNWF Hqrs. chuan thuchhuah siamin, Phainuam khaw nu hoin Mizoram leh hnam chhanna tura hma an lakna leh 'Zonu hnam chhan hnatlang' an huaihawt chu ropui an tih thu leh an chhuan thu an tarlang.

Phainuamah hian November 10, Thawhlehni khan nu hoin an khaw chhung aṭangin khaw dáia Mizote luah chin leh ram an neihna chin thleng kawng an zawh a, Vairengte SDPO leh Mizo IR 10 velin an véng a ni. Buarchep hmuna Assam LP School, tun hnaia bomb puahna bulah ramria duty sipai (SSB)-te'n an lo dang a, mahse, an táwn tlang a ni.

Kawngzawhah hian, Buarchep chu Mizoram a nih thu te, Assam-in Mizoram chuh tawh lo tura an duh thu te, ram chhan turin an zàm loh thu leh thih thlenga beih an inhuam thu te, Bangladeshi-te'n kawngpui dang tawh lo tura an phut thutein an aurual a ni. Kawngzawh tàwpnaah bialtu pastor Rev. Lalrinmawia'n thu a sawi a, MHIP Phainuam Branch leh Vairengte Block hruaitute'n thu an sawi bawk.

MHIP Gen.Hqrs chuan, Thawhlehnia Phainuam khaw nu ho chet dan chu an chhuan tak zet thu sawiin, "Ram leh hnam chhanna atana Mizo hmeichhiate'n ke an pên chhuak hi kan ngaihlu em em a, Vairengte Block MHIP hruaitute leh mi tlawmngai, hnatlanga thawk chhuak zawng zawng chungah lawmthu kan sawi tak meuh a. MHIP-te chuan a ṭul ang zelin kan tih theih chinah hma kan la zel dawn a ni," an ti.

ZPM Zonu chuan, Phainuam nu hoin vai sipai duty tam tak táwn tlanga kawng zawh a, placard-te kenga an au rual leh, an theih ang tâwka ram leh hnam chhan nana an thil tih chu ropui an ti a, an chhuan tak zet thu an tarlang.

Ramri buainaa Phainuam leh a chhehvel Mizo nute chêt dan chu Mizo mipui tan entawn tlâk an tih thu sawiin ZPM Zonu chuan, "Ram leh hnam chhan nana nu ho hian tih hreh kan neih lohzia leh hlauh kan neih lohzia a tarlang chiang hle. Chutih rual chuan, rálthuam nei lo leh hmeichhe áwm ném zawkte chêt chhuah hial a ngai mai hi sorkar hian ṭhanharh phah nan hmang se kan duh tak zet a ni," an ti.

MNWF chuan, Phainuam nu ho thil tih chu huaisenthlak an tih thu sawiin, "Mizo hmeichhiate hi ramri humhalh kawngah, a dáido leh sûlsutute zingah kan ṭang ve thei a ni tih Saihapui-V leh Phainuam nu hoin a taka an lantir hi ropui kan tiin kan chhuang tak zet a ni," an ti a; an thil tih chuan ram leh hnam tan rah ṭha chhuah ngei se an duh thu an tarlang a ni.