Vice President Aizawlah Eng sakhua pawh ni ula a pawi lo Mahse, i ram hmangaih rawh - V Naidu

Vice president M Venkaiah Naidu chuan nimin khan lehlángin Aizawl a rawn tlawh a, Mizoram University (MZU)-ah Academic & Seminar Complex a hawn bakah, Boys & Girls Hostel sak tur lungphùm a phúm. Vice President chuan, India khua leh tui tan eng sakhua pawh vawn a pawina a awm loh thu sawiin, "Mahse, i ram hmangaih rawh u," a ti.

MZU Auditorium-a inkhawm buatsaihah M Venkaiah Naidu chuan, India ram chhung hmun hrang hrangah hnam leh sakhaw hrang hrang zuitu cheng mah se, India chu hmun khat a nih thu sawiin, "Khawi hmunah pawh awmin, eng sakhua pawh bia ila, India ramah kan chian chuan hman kan sawn ang," a ti a; sakhua vanga buaina thlentir chu thil ṭha a nih loh thu a sawi.

Vice President chuan, ram leh hnam thilte humhim a pawimawh thu sawiin, "I culture leh nature humhalh rawh, i nakin hun (future) atan. I pianna ram hi i theihnghilh tur a ni lo. Governor-in Mizo central service-a tlingte an pension hnua Mizorama an kîr leh ṭhin thu min hrilh a, hei hi a ropui ka ti hle. Kan pianna ram ngaihhlut a pawimawh," a ti.

Mahni pianpui ṭawng humhim a pawimawh tih sawiin Venkaiah Naidu chuan, "Intihchangkanna avangin mi tam takin an pianpui ṭawng an hnualsuat ṭhin," a ti a; ṭawng tam tak thiam a ṭha a, mahse, mahni pianpui ṭawng theihnghilh phahna atana hman tur a nih loh thu a sawi.

Vice President chuan, hmeichhiate dah hniamna tumna a ṭha lo tih sawiin, "Mipa leh hmeichhia hi ang khata en tur a ni. India ram hi fatherland a ni loa, motherland a ni. Kan lui hmingte pawh hi hmeichhe hminga phuah deuh vek a ni. Hmeichhe chunga hleilenna hi tihtawp tur a ni," a ti.

India ramin hmasawnna kawng a zawh thu sawiin Vice President chuan, "India ramin hma a sawn tih hi prime minister Narendra Modi tehna aṭanga sawi ka ni lo a, Asian Development Bank-in Modi-a sorkar an tehna aṭanga sawi ka ni," a ti a; ramin hma a sawn zel avangin ṭhalaite tan kawng a inhawn zel tur thu a sawi.

Venkaiah Naidu sawi danin, PM Narendra Modi chu India ram hmasawnna atan chhun leh zanin a thawk a, state sorkarte pawhin thurualpui turin a duh. India ramin hma a sawn zel avangin ram dangte pawhin India ramah invest an duh a, invest tumin hma an la a ni.

Vice President chuan, thawhrima tum a san phawt chuan tumahin an dang thei dawn lo tih zirlai kalkhawmte hrilhin, "Zirna hi naktuk atana inchherna hun a ni," a ti a; zirna chu mi tichaktu, hriatna tizautu, nunphunga mi kaihruaitu leh hna petu tur a nih thu a sawi.

Venkaiah Naidu chuan, President hlui leh scientist ropui APJ Abdul Kalam chu chanchinbu sem ṭhin a ni a, PM Narendra Modi pawh thingpui sem ṭhin a nih thu sawiin, "Kei pawh kut hnathawktu chhungkua aṭanga seilian ka ni a, ka chhungteah lehkhathiam an awm lo. Sikul pangngaia pawh lut thei loin, khawlai sikulah ka kal a ni. Tun dinhmun ka thlen theih chhan chu thawhrimna a ni," a ti.

Mizoramin harsatna a neih, inkal­pawhna leh inbiakpawhna ṭha lo chu sorkar laipuiin a hriat thu sawiin Naidu chuan, "Sorkar laipui leh state sorkarin hma a la zel a. Hmasawnna atan state danga kalin, an thiamnate lak luh thiam a pawimawh," a ti a; public private partnership (PPP) mode hmanga hmasawnna tura hnathawh chu thil ṭangkai tak a nih thu a sawi.

Venkaiah Naidu chuan, MZU awmna chu hmun nuam tak a nih thu sawiin, "Building kan hawn tâk leh sak turte hi MZU-in hmasawn phahna atana a hman ngei ka beisei," a ti a; MZU hotute India ram chhung mai ni lo, Asia ram dangte pan tlaka buatsaih tum turin a chah a ni.

Governor Lt.Gen. Nirbhay Sharma pawhin thu sawiin, India rama awm tan Hindi leh English thiam a pawimawh thu a sawi a, "Kan Vice President pawh hi Telegu hmanna hmuna sei lian a ni a, kei aiin Hindi a thiam ang. Mizote hi in inkhârkhip lutuk a, state dangah eng nge tih tur awm ngaihtuah a, vah chhuah ngam a ṭul," a ti.

MZU vice chancellor Prof. KRS Simbasiva Rao chuan, ram chhung university zingah Mizoram University chuan Ministry of Human Resources Development tehnaah 81-naa hauh mek thu sawiin, "He university tihchangtlun nan medical college leh hospital din a ṭul," a ti a; Mizoramah health sector, a bik takin cancer leh HIV enkawlna tihchangtlun a pawimawh thu Vice President a hrilh.

Vice president M Venkaiah Naidu hi Lengpui Airport aṭangin zing dar 9 velah helicopter hmangin Ṭhuampui Helipad-ah a ṭum a, helipad aṭangin motor hmangin MZU a pan. Chawhma dar 10:10 velah MZU thlengin, inkhawm buatsaih zawhah Raj Bhavan-ah chawchhun a ei a, chumi hnuah Mizoram a chhuahsan leh nghal a ni.

Vice President hi Lengpui Airport-ah minister H Rohluna leh sorkar official-te'n an lo hmuak a, helipad-ah Governor, minister Lalsawta, chief secretary Arvind Ray leh DGP Balaji Srivastava ten lo hmuakin, MZU thleng an ṭawiawm a ni.