Ruihhloin ṭhalaite a tichhia - CM

MZP headquarters, Lunglei chuan nimin khan kumin HSLC leh HSSLC exam-a Lunglei khawpuia zirlai tiṭhate chawimawina hun Saikuti Hall-ah an buatsaih a; khuallian, chief minister Lal Thanhawla chuan, ruihhloin Mizo ṭha­laite a tihchhiat nasat thu a sawi.

Lal Thanhawla chuan, zirlai tiṭhate chawimawina hun buatsaih a ni chu lawmawm a tih thu sawiin, "Vawiina chawimawna dawngtute pawhin tuna an hlawhtlinna hmuh hi duhtâwk mai lo a, phûr leh zual zawka an kalna tura infuihnaah ngaiin, ṭhahnemngai taka tum mumal tak neia an kal zel a pawimawh," a ti.

Tunlaiin ruihhloin Mizo ṭhalaite a tihchhiat nasat thu sawiin Chief Minister chuan, "Sorkar pawhin ruihhlo do dan tur kawng hrang hrang a dap a, hma a la a ni. A hlawhtlinna tak tak erawh ṭanhona leh mahni mimal nun uluknaah a innghat," a ti a; ṭhalaite'n nun an uluk chuan Zoram thar an siam theih tur thu a sawi.

Sorkarin ram hma­sawnna turin kawng hrang hrang a ngaihtuah tih sawiin CM Hawla chuan, "South East Asia ramte nena insumdawn tawnna tichak tura Kaladan Multi Modal Project buaipui mek chu chak taka kalpui a ni a, Mizoram chhim lam hi kawtchhuah pawimawh a ni leh dawn. Insumdawn tawnna tura hmalakna hian kawng hrang hrangah ṭhalaite tan job opportunity a hawng dawn a ni," a ti.

Zirlai tiṭhate chawi­mawina hun hi Lunglei MZP vice president K Lal­rem­ruata'n a kaihruai a, Lunglei MZP president Lal­ram­muanawma leh MZP Gen. Hqrs. president L Ram­dinliana Renthlei-te pawhin thu an sawi.

Zirlai tiṭha chawimawite hi Lunglei khawpuia sikulte aṭanga HSLC leh HSSLC exam-a distinction-a pass-te an ni a, an vawiin mi 120 an ni.