Thenzawlah Scrub Typhus zir chiang

Health Sevices hnuaia Integrated Diseases Surveillance Programme (IDSP) team chuan, May 23-24, 2018 chhung khan Thenzawlah rannung seh natna, Scrub Typhus an zir chiang a; nimin khan Aizawlah an let leh nghal.

IDSP team hi state nodal officer Dr Pachuau Lalmalsawma a ho a, member dangte chu state entomologist Lalfakzuala Pautu leh projectionist Lalchhanchhuaha te an ni.

Thenzawla scrub typhus vanga thihna a thlen dan an zir chiang a, chhiat tâwk chhungte an kâwm a, an in leh a velte uluk takin an enfiah bawk.

IDSP team hian May 23, Nilaini zan khan Then­zawl Joint YMA Hall-ah khawtlang hruaitute ko khawmin, rannung seh natna thlentu, natna lan chhuah dan, inven dan leh a veite enkawl dante an zirtir a; khawtlang hruaitute'n zawhna an neihte an chháng a ni.

Dr Pachuau Lalmal­sawma chuan, "Scrub typhus thlen thei tuhrik kan tih te, a pu darhtu rannung, sazu leh thil dangte hi kan kiangah an ngampat lohna turin mahni in leh a velte kan vawnfai a pawimawh. Khawsik reng reng ngaihthah lo a, a chhan zawng chhuak tura mithiam pan vat a him ber a ni," a ti.

Surveillance team hian nimin khan meeting-ah report te an pe nghal a ni.