Serchhipah containment zone puang

Serchhip district magistrate Dr Lalzirmawia Chhangte chuan, The Mizoram Epidemic Disease (COVID19) Regulations, 2020-a Regulation 11(1) tlawhchhanin Serchhip Chanmary Venga SIRDPR Panchayat Resource Centre campus chu containment zone-ah a puang a, chumi chhunga in chu containment unit-ah a puang bawk.

Tun hnaia state páwn aṭanga Serchhip district-a haw zinga pakhat chu a thlen ní aṭangin SIRDPR Panchayat Resource Centre-ah khung hran (isolate) a ni a, a swab sample endiknaah Covid-19 a vei tih hmuh a ni. Chuvang chuan, Bawrhsap chuan hripui vei mek dahna in leh a chhehvel - in aṭanga hmar lam metre 140, chhak lamah metre 75, chhim lamah metre 120 leh thlang lamah metre 70 huam chhung chu containment zone-ah a puang a ni.

Containment zone huam chhungah phalna nei loa luh leh chhuah khap a ni a; SIRDPR Isolation facility-a a hmaa awm ve mi dangte chu hmun dangah sawn an ni. Zone chhunga cheng/khawsa zawng zawngte chu Aarogya Setu Apps-ah in register vek tura hriattir an ni bawk.