Commission for Child Rights-in CJ an enfiah

Mizoram State Commission for Protection of Child Rights (MSCPCR) chuan, nimin khan Central Jail-a nuin an fa an tànpuite dinhmun an enfiah.

Jail chhunga naupangte enkawlna pek dan ṭha thawkhat mah se, hmasawnna tur leh tih ngai tam tak a la awmah an ngai. Nimina Central Jail an tlawh lai hian nuin an fa an tànpui naupang pali an awm mek.

MSCPCR aṭanga thu dawn danin, Supreme Court chuan Civil Writ Petition pakhat a ngaihtuahnaah, jail-a naupang awmte'n nunphung, hriselna leh zirna lama naupang dangte anga hma an sawn theihna tura hma la turin state sorkar tin a hriattir a ni.

Jail-a táng nu, nau pai mekte chu a bika enkawlna pe tur te, nau neih dawnah jail aṭanga an chhuah lailâwk theih dan tur ruahman tur te, naupang tan an mamawh chaw ṭha a hranga pe tur te, nausen chaw siamna tur bungbél mamawh ruahmansak tur te, naupang hri danna ṭha taka pe tur te, nau awmna (creche) leh lehkha an zirna tur nursery ruahman turte leh, nau pawm tana pindan hran siamsak turtein Supreme Court chuan thupek a chhuah tawh a; naupang kum 6 tling tawh chin jail-a awmtir a khap bawk.

Supreme Court-in jail-te tih tura thupek a siam hrang hrangte aṭanga tehin, Central Jail dinhmun chu a ṭha thawkhat niin MSCPCR chairperson Sangzuali Vanchhawng chuan a sawi a; chutih laiin, naupangte tan a bika ei tur chaw ṭha pek a la ni lo leh nausenin an nute ei ang apiang an ṭâwm ve mai chu a rang thei anga hmalak thuai a ṭul thu a sawi.

Sangzuali Vanchhawng chuan, naupang leh an nute tana pindan hran awm lo leh táng dangte nena a huhoa dah khawm vek an ni chu naupang rilru ṭhan lenna kawnga thil ṭha lo thlen thei a nih thu sawiin, "A hranga an awm theih dan tur ngaihtuah thuai a ṭul," a ti a; chutih laiin, faina leh thianghlimna kawnga Central Jail enkawltute hmalakna chu fakawm a tih thu a sawi bawk.

Central Jail enfiahnaah hian MSCPCR chairperson bak­ah, member dang - Dr Julie Rem­sangpuii Fambawl, J Malsawm­zuala Vanchhawng leh K Mal­sawmzuali te bakah, case worker Varthanpuii Varte leh outreach social worker C Lalduhawma te an tel a ni.