Martar pathumte ruhro la chhuak

Ex-Mizo National Army Asso­ciation-in rambuai lama hnam sipai thi zinga mi pathumte ruhro an lak chu nimin khan MNF party pisa, Mizo Hnam Rûnah thlen a ni a, sûnna hun hman a ni.

Ruhro an lak chhuah tharte chu - MC/No.309 Capt. Laldawngliana s/o Thanga, N. Khawdungsei, March 7, 1977-a thi leh N.Khawdungseia phûm te; parliamentary secretary Sangkunga s/o Darrothanga, Khaw­bel, November 17, 1967-a thi leh Chhingchhip tlanga phûm leh, Revenue officer Lalbuana s/o Hauthanga, Tualte, February 12, 1967-a thi, Vangtlaia phûmte an ni.

Ex-MNA-te tarlan danin, Mizoram tana martar mi pathumte ruang hi an phûmna aṭangin an phawrh a, Martar Thlanmual, Luangmualah dah tura ruahman a ni.

Mi pathumte ruhro an lak theih nana anmahni phûmna khuaa YMA leh khawtlang mipuite'n an puihnaah Ex-MNA Association chuan lawmthu an sawi.

Mizo Hnam Rûna sûnna in­khawmah MNF senior vice president leh MNF army chief hlui Tawnluia chuan, ram leh hnam tana thisen far tàwp thlenga nunna hlantute chu Zoram mipui leh MNF-in zahna chibai an bûk tih a sawi a, "An sakruang ral tawh mah se, kan thinlungah an nung reng a. Hnam martar-te hi hnam meichher chhi êngtute an ni," a ti.

Ex-MNA-te hian an pisaah martarte zinga mi pakuate ruhro an kawl mek a, chu'ngte chu June 12, 2018 khian Synod Conference Hall-ah thlahna inkhawm neihpui an tum a, chumi hnuah Martar Thlanmual, Luangmualah dah an tum a ni.