CM-in hostel leh library a hawng

Mizoram Polytechnic, Lungleia ST Womens Hostel leh Library cum Seminar Hall chu May 23, Nilaini khan chief minister Lal Thanhawla'n a hawng.

Chief Minister chuan, tum mumal tak neih a pawimawh thu sawiin, zirlaite chu hmathlir thui tak nei chunga an zirlai an zawh hnua an hnathawh tur leh an eizawnna tur ngun taka ngaihtuah lâwk turin a chah.

Ram hmasawnna chak taka kalpui turin mahni kut kea eizawnna dap thiam, entrepreneurs ṭhahnem tak an awm a ṭul thu sawiin CM Hawla chuan, "Ṭhalai tam zawkte'n mahni kutkawiha eizawnna kawng an zawh theih nan NEDP hnuaiah Entrepreneurship Development Scheme siam a ni," a ti.

Mizoram Youth Commission (MYC) chairman Joseph Lalhim­puia, MLA pawhin thu sawiin, Mizoram chhim lama zirlaite'n NEET leh IIT-JEE exam atan ṭha taka an inpuahchah theih nan MYC-in India rama coaching centre hlun berte zinga mi ALS, Delhi kaltlangin online coaching centre a hawn thu a sawi a, "UPSC leh SSC coaching-te pawh kalpui zel a ni dawn," a ti. Zirlaite chu ram leh hnam tana chhawr tlak thiamna neih tum turin a fuih.

ST Womens Hostel hi Ministry of Human Resource Development aṭanga sum hmuh cheng nuai 100 senga sak a ni a, khum 50 a awm. Library cum Seminar Hall chu All India Council for Technical Education - North Eastern Quality Improvement Program (AICTE-NEQIP) aṭanga sum hmuh cheng 120 hmanga sak a ni.