Kawng ṭha taka siam turin sorkar phût

MNF party ṭhalaite chuan nimin khan Ramrikawn leh Sakawrtuichhun inkar kawngpui blacktop hna thawh mek leh siam zawh tawhte a hmunah an enfiah. Kawng siam siamṭhat mek leh siam hmabakte chu a nih dan tur ang taka siam turin Mizoram sorkar an phût.

MNYF vice president Lalrem­ruata Chhangte chuan, kawng siamtu contractor-in hna a thawk lawk thei lo nia sawiin, "Ramrikawn leh Sakawrtuichhun inkar km. 3 lek blacktop tur hian Tantia company-te sub-contract-in a thawhtir hial. Hetiang contractor hna thawk thei lo thlangtu hi chief minister Pu Lal Thanhawla leh Pu Lal Thanzara te unau an ni a, contractor nen hnung thak inhiat tawnin sam an inphiar zawm ngeiah kan ngai nghet tlat. An unau duhsak rawn vai company Sunshine Overseas-a an tih angin, engzat % nge share an lak ve sawi thuai turin kan phût a ni," a ti.

MNYF tarlan danin, Ramri­kawn-Sakawrtuichhun-PTC Road hi km. 7.75-a thui a ni a, October 2016-a NABARD aṭanga sum hmuh leh state sorkar sum tum, a vaiin cheng nuai 931.86 hmangin contractor Lalfamkima, Ramhlun North-in January 2017-ah work order a hmu. Kum 2017 chhunga thawh zawh tur ni mah se, tun thlengin hna thawh tur aṭanga 80% vel bak thawh la ni lo.