Pawl 11 zir turte harsatna MSU-in Minister-ah an thlen

Mizo Students' Union (MSU) hruaitute chuan May 23, Nilaini khan School Education minister H Ro­hluna an hmu a, HSLC 2018 pass tharte pawl 11 zir zawm turin sikulah seat an chan loh chungchang an thlen.

MSU chuan, Educa­tion Minister hnenah hian zirlai pawl 11 zir tur­te'n sikulah class room a tam tawk loh avang­in harsatna an tawh thu thlenin, sikulte'n an building-te an zauh theih nan leh zirlaite harsatna sutkian a nih theih nana hma la turin an ngen tih an sawi a, "School Education Minister pawhin hmalak a tum thu min lo hrilh avangin lawmawm kan tih a, beiseina nen hmalakna kan en zui dawn a ni," an ti.

MSU chuan, Medical Council of India (MCI) leh Ministry of Health & Family Welfare (MHFW)-in Mizoram Institute of Medical Education & Research (MIMER) din an phalsak ta chu lawmawm an tih thu an tarlang bawk.