Chhiah lâk luh tipung tura Hmalak dan tur sawiho a ni

Taxation department officer-te chuan nimin khan an minister Lalchamliana hoin a pisaah Covid-19 hripuiin sorkar sum dinhmun a nghawng dan leh chhiah lâk luh tipung tura hmalak dan tur an sawiho.

Lalchamliana chuan, hripuiin min tibuai hle chung pawhin Taxation department-a thawktute inpekna avangin hmasawnna hmuh a nih thu a sawi a, "Chhiah pek pawimawhna mipuite'n kan hre telh telh a, sorkar department dangte pawhin min hriatpui zel hi a lawm­awm. Chhiah pek hi kohhran inrêlbàwl dan nen a inang deuh a, kohhran member-te thawhlawm tel lo chuan kohhran a kal thei lo ang hian, khua leh tuite'n chhiah pek kawnga kan harh ang zelin ramin hmasawnna a hmu ṭhin," a ti.

Meeting-a tarlan dan­in, March 2020 tàwp lam aṭangin mumal taka sumdawnna kalpui theih a nih loh avangin April 2020-a chhiah hmuh chu cheng vbc. 14.35 a ni a, May-ah chuan chhiah lut pungin, vbc. 46.08 a ni. Sorkar kum kal mek, 2020-21 chhungin chhiah cheng vbc. 60.44 hmuh a ni tawh.