ZPM-in BERF 1875 ramri an pawm Hruaitu huaisen kan mamawh - ZPM VP

ZPM party chuan, Mizoramin hruaitu huaisen, taima leh dik a mamawh thu leh kût phuahchawp aia châk lâkna kawngpui sial ngai pawimawh zawk sorkar a mamawh thu tarlangin, chutiang sorkar chu pek an tiam tih an puang. ZPM party-in Mizoram ramria an pawm chu Bengal Eastern Frontier Regulations (BEFR) 1875-a ramri a nih thu an sawi bawk.

ZPM vice president K Sapdanga chuan nimin khan Aizawlah thuthar thehdarhtute kâwmin, ramri váng emaw, thil dang emaw vangin Mizote leh Cachar mite nen an la innghirngho fo theih thu a sawi a, "Eng tikah nge huaisen chhan tur kan neih ang tih a la lang rih lo. Kan mamawh chu hruaitu huaisen, taima leh dik neih phawt a ni. Kût phuahchawp aia châk lakna kawngpui sial ngai pawimawh zâwk tur sorkar Mizoram hian a mamawh tak zet. ZPM hian chutiang sorkar chu pek kan tiam e," a ti.

K Sapdanga chuan, an party-in Mizoram ramria an pawm chu Bengal Easter Frontier Regulations (BEFR) 1875 hmanga Mizote luah chin tura ramri siam a ni tih a sawi a, "Hei tho hi Mizorama party tin leh Mizoram sorkar pawhin a pawm a ni," a ti a; Mizoram sorkarin ramria a pawm a humhalh ṭha lo erawh pawi an tih thu a sawi.

Ramri chungchang chu politics issue a ni tih sawiin Sapdanga chuan, "Official-te inbiaktira chinfel mai chi a ni lo, ni se la chuan kan Chief Secretary-ten an sawi fel tawh ang," a ti a; Mizoram sorkar official-te'n Union Home Secretary leh Assam Chief Secretary-te an be zing tawh hle tih sawiin, "Ramri buai hi ZPM chuan boruak muanawm tak hnuaiah political level-a inbiak ngei turah kan ngai," a ti.

Ramri chungchangah hian Mizoram sorkarin political party zawng zawng koh khawm a, ro a relpui a hun hlea an ngaih thu sawiin K Sapdanga chuan, Mizoram sorkarin tun thlenga party dangte sawihopui ṭul a ti tlat lo chu mak an tih thu a sawi a, "Pawl dangte hriatpui atana a duh loh hi Assam-a BJP sorkar nen hian thuthlung an nei ru reng palh ang tihte pawh kan hlauthawng hle a ni," a ti a; ZPM chu sorkar thláwp tura an inpeih reng thu a sawi.

ZPM vice president K Sapdanga sawi danin, kumin October thla tìr lam aṭanga ramria buaina chu ṭum danga buaina nen a danglam hle a, a hmaa buainate chu lamliana buaina a nih ṭhin laiin, tun ṭumah chuan Thinghlun, Saiphai, Phaisen, Saihapui, Phainuam leh hmun dangahte a tak takin ramri inchuh a ni thung.

→    Ramria chêng Mizote chu hna mumal thawk thei loin thla khat chuang ramri véngin an buai tawh; khawsak harsa tak takte an ni. Hna an thawh theih loh vanga an hloh hen tâwk chhawmdawlna pe turin Mizoram sorkar kan phût. In leh thlám hàlsak te, eizawnna huan thlai tihchhiatsakte hi an hloh hen tâwk ṭanpuina pe ngei turin kan phût bawk.

→    Ramria buai dan hi chîk zawkin zir ila, Assam ruling BJP hian an mipui thlavang hauha Mizoram an nêk ngamzia lantirna atan an hmang a ni ber a; party dang pawhin chu chu hmuin, Mizoram an rawn innêk huaisiak tawh a ni ber. Heti taka kan zuamawm ta hi a zahthlakin a tlàwmthlak viau mai. Thil chhe zawk a thleng ang tih hlauin CYMA hial a pên chhuak ta a, a thlamuanthlak tak zet a, beiseina thar a awm.

→    Ramri buai kaihhnawih Lailapur road block vanga heti taka Mizoram mipuite'n harsatna kan tawh hnuah hian, Mizoram sorkar hi ngáwi tlat loa pên chhuak a, mawhphurhna la ngam turin kan phût. Disaster Management Act-te bih se, hripui lèn laia kawngpui block phal a nih loh dante hai chhuakin tlawh chhan se, tharum hmanga mipui min chhan ngam lo a nih pawhin, dan hmang talin min chhan turin kan beisei.

→    Cachar lam kawtchhuaha misual tlemtêin kawng an dan vanga Mizoram mipui buaina a zing zozai ta. Kawtchhuah dang kan nei lo a ni si lo. Manipur leh Tripura nen inkalpawhna kawngpui siam theihna kawtchhuah remchang ṭha kan nei reng a, Myanmar leh Bangladesh-te nen insumdawn tawn theihna kawtchhuah remchang tak pawh kan nei nual bawk. Chungahte chuan inkalpawhna kawngpui siam ṭul kan tih thu hi kum 40 chhung chu kan sawi tawh a ni. Chhúra chêngkek lo tur kan ang khawp mai.