KHAWTHLIR

Kolasib district Border Safety Monitoring Team ruahman anga Phaisen khuaa ramri vengtu tur Kolasib Vengthar Branch YMA member-te chu nimin khan DC pisa tual aṭangin an chhuak a, SDO(Sadar) Vanlal­chhuanawma Chawngthu-in a vailiam. Kolasib Vengthar YMA member zinga ramri vengtu turte hi mi 20 an ni a, June 15 thleng Phaisenah ramri an veng dawn a ni.

Lawngtlai Vengpui Young Lai Association (YLA) Hall chu nimin khan district bawrhsap Shashanka Ala-i'n a hawng. Hall hi kum 2010 vela sak ṭan niin, sak zawh lohin eng emaw chen a awm a, DC Shashanka Ala-i'n thawm ṭhatna tur Rs. 2,00,000 a pek hmangin sak zawh a ni.

Haulawng tlangval T Lal­himpuia (25) s/o T Lal­-

lungmuana chu Covid-19 veite enkawl turin a inpe. 

Thu dawn danin, T Lalhlimpuia hi kum 2018-a health worker zir zo tawh a ni a, nimin khan Lungleia Health department hotute hnenah kalin, Covid-19 veite hlawh nei loa enkawla thawh a duh thu a thlen a; Covid Care Centre, Pûkpui, Lungleiah a ṭul angin an chhawr dawn a ni.

Ministry of Human Resources Development hnuaia National Institutional Ranking Framework chuan India rama university hrang hrangte dinhmun an endikna ti chhuakin Mizoram University chu 67 a ni. Hmarchhaka university zingah MZU bakah hian Tezpur University (39-na), Gauhati University (47-na), NEHU (49-na) te chu top 100 ah an lang.

Kanan Veng Branch YMA chuan YMA Day pualin nimin khan an YMA Hall-ah blood donation camp an huaihawt a, Aizawl Civil Hospital tan mipa 69 leh hmei­chhia pasarihte'n thisen unit 76 an pe.

Rajya Sabha MP Ro­nald Sapa Tlau chuan Covid-­19 donaa a ṭul apianga hman turin MP fund 

aṭangin nimin khan Chief Minister's Relief Fund-ah Rs. 5,00,000 a pe a, ramri venga YMA duty-te ṭanpui nan Central YMA-ah Rs. 5,00,000 a pe bawk. Ronald Sapa Tlau hian MP fund aṭangin Indian Medical Association, Mizoram Chapter 

hnenah Covid-19 do nan Rs. 10,00,000 a lo pe tawh bawk.

Zote Branch YMA leh Champhai Police ṭang­kawp chuan nimin zing khan Myanmar aṭanga dan loa meizial (cigarette) lak luh báwmpui 24 an man. Cigarette phurtu Pik-Up MZ-04 A-1676 hian Zote YMA duty post su chhiain a tlan tlang a, New Champhaiah man a ni. Cigarette neitua puh Damkhanngo (68), New Champhai leh lirthei khalhtu kum tling lo leh kumtling lo motor khalh­tir vangin motor neitu  Ningthantluanga, Champhai Vengthar man an ni.