Bangladesh leh Myanmar nena sumdawnna tihchangtlun thu sawiho

Mizoram leh ṭhenawm ram pahnih - Bangladesh leh Myanmar nena insumdawn tawnna tihchangtlun leh tihhmasawn dan tur ngaihtuahin nimin khan Commerce & Industries minister Dr R Lalthangliana hoin Secretariat conference hall-ah sorkar hotute an ṭhukhawm.

Ṭhutkhawmah hian Industrial Develop­ment Board vice chairman C Ramhluna bakah, Commerce & Industries, PWD leh Land Revenue & Settlement department hotute an tel.

Minister Dr R Lalthangliana chuan, ram a ṭhang zel a, ram leh ram insumdawn tawnna chu sorkar laipuiin a ngai pawimawh zel tih sawiin, "Mizoram pawhin theihtawpin ṭan a la ve zel," a ti.

Dr R Lalthangliana chuan, "Tunah hian Mizoramin ramria sumdawnna hmun atana a hman ṭhenkhatte hi tun hma aṭang tawhin sumdawnna a kal rengna hmun a ni a, ram leh ram inhriatpuinaa sumdawnna a kal theih chuan, awlsam leh ṭha zawkin sumdawnna a kalpui theih dawn a ni," a ti a; ram dang nena insumdawn tawnna chu ram hmasawn phahna tur a nih thu a sawi.

Sorkar thuchhuah tarlan danin, Mizoramin ramria sumdawnna a kalpui mek leh nasa lehzuala kalpui a tumna hmun - Zokhawthar Land Custom Station, Kawrpuichhuah Integrated Check Post, Zorinpui Land Custom Station leh Saisihchhuah Trade Centre-ahte sorkar laipui ṭanpuinain hmalak zel a ni.

India leh Myanmar sorkarte'n thuthlung an ziah angin Hnahlan, Zote, Vaphai (Saikhumphai) leh Pangkhuaahte insumdawn tawnna atan Border Haat sakna turin ram hmuh a ni tawh a, land lease tihfel mek a ni. Border Haat sakna tur hian sorkar laipui ruahmanna angin pakhatah Rs. 50 ruahman a ni a, sum dilna thehluh a ni tawh. Myanmar ram nena inkalpawhna tur lei (bridge) dawhna hmun tur pawh Myanmar official-te nen enfiah tawh a ni a, sorkar laipuiah thehluh tawh a ni.

Bangladesh nena Border Haat hmanga insumdawn tawn theih nan Marpara, Silsury, Tuipuibari leh Nunsury-ahte haat siamna turin sorkar laipuia Ministry of Commerce hnenah thlen a ni tawh bawk.

Mizoramin international boundary km. 722-a thui a nei a; khawchhak leh chhim lamah Myanmar nen ramri km. 404-a thui leh khawthlang lamah Bangladesh nen ramri km. 308-a thui a nei a ni.