CM Hawla case pakhat Court-in a titawp ; Thubuai pakhat ngaihtuah zui a ni dawn

Kum 2013-a Assembly inthlan dawna nomination paper theh­luhnaa affidavit dik lo thehluta puh a nih chungchangah chief minister Lal Thanhawla chu nimin khan Serchhip Chief Judicial Magistrate (CJM) hmaah a inlan. Court chuan Lal Thanhawla puh a nihna pakhat a hnâwl a, pakhat dang erawh chu ngaihtuah zui zel atan a pawm.

Lalhriatrenga Chhangte, Serchhipin election affidavit-a Lal Thanhawla'n a kum zat a tidanglam ṭhin nia a puh chungchangah Lal Thanhawla ukilte chuan hnialna tur an neih hrang hrangte Court-ah an thehlut a ni. CJM chuan thubuai chungchang hi a ngaihtuah hnuah, Lalhriatrenga Chhangte-in thubuai a thehluh hian complaint thehluh hun limitation period (kum khat chhung) a pelh tawh avangin ngaihtuah zui zel tlak loah ngaiin a hnâwl.

Election affidavit-ah Lal Than­hawla'n Kolkata New Town-a a in hmun a ziak tel loa puhna chu CJM-in a pawm leh pawm loh Lal Thanhawla a zawt a, CM Lal Than­hawla chuan a pawm loh thuin a chháng. He thubuai bik hi CJM chuan kalpui zel tlakah a ngai a, June 25, 2018-ah Chief Minister laka thubuai thehluttu Lalhriatrenga Chhangte leh a thuhretu Kapliana Pachuau-te chu thu a zawtfiah ve leh ang.

Court-a a inlannaah hian Chief Minister hi Court chhungah a ukil Remsanga Nghak leh Lalthanpuia ten an ṭawiawm a; Lalhriatrenga Chhangte pawh a ukil C Lalram­zauva, Ramthianghlima leh L Lal­nunsiama te'n an ṭawiawm thung. Lal Thanhawla hi Court tualah Congress mi leh sa eng emaw zatin an lo hmuak a, MNF mi leh sate pawhin Lalhriatrenga Chhangte an ṭawiawm ve bawk.

Lalhriatrenga Chhangte hian January 17, 2018 khan kum 2013 MLA General Election neih dawna affidavit dik lo thehlutah CM Lal Thanhawla a puh a; Serchhip District Court-ah thubuai a thehlut a, criminal complaint No. 1/2018U/S190r/w Section 200 of Cr.PC hnuaiah thubuai ziahluh a ni.

Lalhriatrenga Chhangte vêk hian November 3, 2017 khan Election Co­mmission of India-ah Lal Thanhawla hian kum 2013 MLA General Election neih dawnah Kolkata New Town-a a in hmun chu a tarlan telh loh thu a thlen a, "Chuvangin, a affidavit hi false affidavit a ni a, hei hian Section 125-A of the Representation of the People Act, 1951 a kalh a ni," tiin thubuai a thehlut a ni.

Election Commission of India thu­rawn angin Lalhriatrenga Chhangte hian Lal Thanhawla affi­davit a thehluhna Assembly con­stituency huam chhunga District Court-ah thubuai hi a thehlut ta a ni.

Lal Thanhawla hian kum 2003-a Assembly General Election dawna a affidavit thehluhah kum 57 mi niin a inziak a, kum 2008-a Assembly General Election dawnah erawh chuan kum 68 niin a inziak thung a, kum 2013 MLA General Election affidavit-ah chuan kum 71 angin a inziak leh a ni.