NCP-te ZMP-ah an inchhûng lut

National Congress Party (NCP) chu nimin khan ṭangrual pawl, Zoram Peoples' Move­ment (ZPM)-ah an inchhung lut. NCP-te hi nimin khan ZPM pisaah lawmluh an ni a, an rual hian ZPM zawm thar mi eng emaw zat lawm luh an ni bawk.

Mi thar lawmluh inkhawm hi ZPM treasu­rer F Rodingliana'n a kai­hruai a; thu sawitu, ZPM chairman Lalliansawta chuan, "ZPM hian party angin ‘lawm lut’ kan ti ngai lo. Hna thawhpui tur kan nei belh zel hi kan lawm tak zet. Kan ram siamṭha tur hian keini'n kan thei lo tih kan hria a, a siamṭha theitu chu Pathian a ni a, mi dangte nen kan inbeihnaah pawh Pathian malsawm tlakin kan thawh a ngai. Mi dang thin ti-ur leh hriatreng chi kan pumpelh ṭhin tur a ni," a ti.

Lawm luh tharte aiawha thu sawitu, Mal­sawmzuala, Mission Veng MNF Unit president ni lai chuan ZPM a zawm chhan sawiin, “Mizoram páwna lehkha kan zir lai aṭangin ram ka vei ṭhin a, diknain hmun a chang loin ka hre ṭhin. Chhung khat pa berin a nupui fanau a enkawl hi a tih tur, a mawhphurhna a nih angin a thawk mai tur a ni," a ti a; ZPM-in ram kaihhruai an tumnaah Pathian an dah hmasak a, ram an siamṭhat a rin tlat thu a sawi.

ZPM-in nimina an lawm luhte hi NCP bakah mi 10 an ni a, an lawm luh zingah hian MPS (rtd.) Zairemi, Khatla South; MSS (rtd.) Lalhming­mawia, Khatla South leh MSS (rtd.) V Lalchhuana, Mission Vengthlangte an tel.