Mizoram Cabi- net-in May 28-ah 7th. Pay a ngaihtuah dawn?

Mizoram Information Service Association (MISA) chuan nimin khan IPR Auditorium-ah Annual Conference 2018 an hmang a, Finance minister Lalsawta khuallian a ni. Minister chuan, Mizoram sorkar hnathawkte 7th. Pay pek dan tur ngaih­tuah mek a nih thu leh May 28, Thawhṭanniah Cabinet mee­ting-ah ngaihtuah hman beisei a nih thu a sawi.

Minister Lalsawta chuan 7th. Pay Commi­ssion rawtna anga Mizoram sorkar hnathawkte hlawh pek chungchang sawiin, "Mizoram sorkar hnathawkte 7th. Pay ngaihtuah mek a ni a, a zir chiangtu Committee-in recomendation a siam chu May 28 khian Cabinet meeting-ah put luh theih turin ruahman a ni. Hlawh sang pe turin sorkarin cheng tam tak a sèn belh dawn a, mahse, heta tan hian pawisa kan neiin ka ring," a ti.

Lalsawta chuan, thu thar leh thil pawimawh dang puan darhnaah mipuite'n a nihna ang tak an hriat a pawimawh tih sawiin, "Thu dik lo vangin ṭul loah buaina a chhuak thei a ni," a ti a; sorkar hmalakna puan darh kawngah ṭhahnemngai taka thawk turin MISA member-te a chah. IPR department-in an directorate hmuna multi facility centre tur, Lianchhiari Rûn sak an tum chuan ṭangkaina tam tak a neih dawn thu sawiin, MISA chu an kal zelna turah duhsakna a hlan a ni.

MISA president David L Thangliana chuan, MIS-te chu sorkar hmalakna leh hnathawhte puangzartu ber an nih thu sawiin, Mizoram Journalists' Association (MJA) nena thawhhona ṭha tak an nei zel chu lawm­awm a tih thu a sawi.

MISA Conference hi an vice president C Lalnunkima'n a kaihruai a, general secretary Malsawmsanga'n report a pe. Business session neih a ni bawk a, an pawl thil pawimawhte an rel a ni.