KHAWTHLIR

Police tan Moral Reformation Camp
2nd. Battalion MAP, Lunglei chuan an mi leh sa, zu leh a kaihhnawih vanga harsatna tâwkte khai chhuahna turin May 22, 2018 aṭang khan Moral Reformation Camp an buatsaih a, nimin khan a ṭiak. Camp-ah hian police 70 an lut a, speaker atan Rev. K Lalbiakenga, Maranatha Team hman niin, sermon, physical exercise leh inkawmna hunte hman a ni a; taksa, rilru leh thlarauah hmasawnna nasa tak an chang niin sorkar thuchhuah chuan a tarlang.

MZU-ah workshop buatsaih
Mizoram University Students' Discussion Forum (MZUSDF) leh Mizoram Youth Com­mission (MYC) chuan nimin khan MZU-ah 'International Scholarship and Study Abroad' tih thupui zirhona an buatsaih. Workshop-ah hian Alinery Lalngilneii Lianhlawng, University of Sussex, UK leh MZU-a controller of examinations Dr Lal­than­chami Sailo ten India ram pawna post graduate leh research zir dan leh scholarship ngaih­ven dan an sawifiah a ni.

Mamitah COTPA bawhzui
Mamit District Anti Tobacco Squad, District Level Task Force leh Legal Metrology-te chuan nimin khan Mamita bazar, sikul, pisa leh dawr hrang hrangah Cigarettes and Other Tobacco Products Act (COTPA) bawhchhia an awm leh awm loh an enfiah. Phal lohna hmuna mei zu mi pakhat an man a; kum 18 hnuai lam hnena vaihlo hralh khapna thu tarlanna signage tár lo vaihlo zuartu mi pahnih chu pawisa an chawitir a, health warning awm lo foreign cigarette báwm 1,595 an man bawk.

Office tlawh chhuah tum
Champhai Ṭhalai Pawl (CṬP) hruaitute chu Ningani khan Kahrawt YMA Hall-ah an ṭhukhawm a, hun remchang hmasa beraa Champhai khawchhunga office hrang hrangte tlawh kuala an harsatna te zawh pah a, thawhpuiah sawm an rel. CṬP chuan Champhai Nature Conservancy chu an hmalakna Pro­ject Tlaizawng leh Champhai zawl humhalh kawngah an thlawp tlat thu tarlangin, hlawhtling ngei turin duhsakna an hlan a ni.