Buarpui 33KV sub-station thar hawn a ni

Buarpui khuaa 33KV sub-station thar chu May 24, Ningani khan Power & Electricity minister R Lalzirliana'n a hawng. Minister chuan, Power & Electricity (P&E) department chu department lian tak a nih avangin thawktute chu hlem­hlêtna leh eirûkna hrang hrang lakah fihlim tura a duh thu a sawi.

R Lalzirliana chuan, P&E department-a thawkte chu eirukna hrang hrang lakah fihlîm tura a duh thu a sawi rualin, kawlphetha chu mi tin mamawh a nih avangin, mipui leh mahni ram leh hnam hmasawnna tur an chanpual lo ît a, lo eiru lo turin a ngen a ni.

Hre reng chunga eiru ngam chu politician emaw, sorkar hnathawk emaw pawh ni se, an tla ngam tur a ni tih chu mi ngaihdan a ni tawh tih sawiin P&E Minister chuan, "Mite hriat reng tlak tur méllung kan phun em tih hi ngaih pawimawh atan a ṭha," a ti.

Minister R Lalzirliana chuan Mizoram sorkar hmalaknaa P&E lama hmasawnna leh hmalakna hrang hrangte a sawi lang a; Vankal, Lungpher leh Sihhmuiahte ni zung chakna (solar energy) hmanga kawlphetha siam chhuahna tur bun mek a nih thu leh, a hlawhtlin chuan khaw dangah pawh siam zel tum a nih thu a sawi. Buarpui khawtlangin an lo dil angin street light 10 pek ngei an tum thu a sawi bawk a ni.

Khualzahawm, bialtu MLA Chalrosanga ralte pawhimn thu sawiin, Buarpui khuain hmasawnna hrang hrangte sawi­in, P&E Minister-in Buarpui khaw hmasawnna tura a puihnaah lawmthu a sawi a; Buarpui 33KV sub-station dinna kawnga hma latu hrang hrangte chungah lawmthu a sawi bawk.

Buarpui 33KV sub-station-ah hian transformer lian power transformer bun a ni a, chu chuan Buarpui leh a chhehvel khuate kum tam tak chhung a chawm thei dawn a ni. Transformer lian aṭangin khaw hrang hrang pekna 11KV line pathum siam a ni a, chungte chu - Buarpui khaw chhung pekna te, Déngsur, New Khawlêk leh South Khawlêk pekna te leh, West Bung­tlang leh Káwlhâwk peknate a ni.