Champhai MZP-in zirlai ti ṭha chawimawi

Champhai MZP chuan nimin khan Govt. Champhai College-ah kumin HSLC leh HSSLC exam-a ti ṭhate chawimawina hun an buatsaih a, minister of state Vanlalawmpuii Chawngthu-in a hman pui.

Vanlalawmpuii Chawngthu chuan mi hlawhtling kan tihte hi thawkhleh khata hlawhtling nghal thut an awm lo tih sawiin, "An hlawhtlinna kawngah hian harsatna leh mangannate, lungngaihna tam tak an tawk ṭhin. Hausa leh thawmhnaw manto neite hi mihlawhtling ber nihna a ni lo. Hlawhtlinna chu thiam theih vang emawa neih theih a ni loa, taimakna leh tumruhna nena beidawng loa bei tang tangte neih theih a ni," a ti.

Zirlai kalkhawmte chu social media hman dan chin tawk thiam tura chahin Vanlalawmpuii chuan, "Zirlai nih chhung chuan mobile phone-te hi inbiakna atana baka hmang lo hram tur. Social media-a thu chi hrang hrang vawrh darh ṭhinte hi a dik tawk leh dik tawk loh fiah ṭhin a ṭul," a ti a, NGO a inhman dan chin tawk hriat a pawimawh thu a sawi.

Khualzahawm Champhai North bialtu MLA TT Zothansanga chuan zirlai tiṭhate chu hmun dangah pawh zirlai tiṭha tak tak an awm nual avangin ṭan la lehzual turin a fuih a, "Hlawhtlinna tak tak chang turin kawng zawh tur tam tak a la awm a ni. A thawkrimte chauh dinchhuahna tur khawvel a nih avangin zirlaite chu hlawhtling tura thawhrimna leh taimakna a pawimawh ber," a ti.

Zirlai tiṭha chawimawina hunah hian Champhai district chhunga zirna in aṭanga HSLC distinction-a pass 60 te leh HSSLC distinction-a pass pasarih leh HSLC-a first division-a pass 80 te an ni.