Youth Summit & Road Show zo fel

Mizoram Youth Commission (MYC)-in Lunglei Concention Centre-a Youth Summit & Road Show 2018 an buatsaih chu May 24, Ningani khan khâr a ni a; heti hian MYC-in district khawpui tinah Youth Summit & Road Show an buatsaih chu zawh fel a ni.

Youth Summit & Road Show khârna inkhawm hi Lungleia chief judicial magistrate Julie Lalrinzami'n a kaihruai a; Assembly deputy speaker R Lalrinawma'n thu a sawi. R lalrinawma chuan, Youth Summit & Road Show chu thil thar a nih thu sawiin, "Sorkarin ṭhalaite tan zirna leh infiamna lamah chak takin hma a la a, hei hi ṭhalaite'n remchannaah la a, an hman ṭangkai thiam a ngai a ni," a ti.

Planning secretary Dr Vanlalram­sanga pawhin thu sawiin, "Taimâkna, tumruhna leh hlawhchham duh lohna neite an hlawhtling ṭhin," a ti a; MYC hmalakna chu chhawr ṭangkai tur leh hmasawn duhna rilru put tum turin ṭhalaite a chah.

MYC hian Youth Summit & Road Show hi kumin April 17-ah Aizawlah an buatsaih ṭan a; April 24-ah Kolasib-ah, April 27-ah Mamitah, May 4-ah Champhaiah, May 9-ah Serchhipah, May 15-ah Siaha leh May 18-ah Lawngtlaiah, May 23-24 ah Lungleiah an buatsaih leh a ni.