2017-18 chhungin MLA hluite MR bill atan Mizoram sorkar Rs. 41,79,183 a sêng

Sorkar kum liam ta, 2017-18 chhung khan MLA hluite leh an nupuite damdawia an inenkawlna, medical reimbursement (MR) bill atan Mizoram sorkar chuan Rs. 41,79,183 a sêng. Hetih lai hian, Former Legislature Association of Mizoram (FLAM)-in MLA hluite damloh nikhuaa phaia an zinna man, travelling allowance pe ve tura sorkara an ngenna chu pawmpui a la ni lo.

RTI Act hmanga zawhna Assembly Secretariat-in a chhan danin, kum 2017-18 chhung khan MLA hlui 21-in MR bill an nei a, an bill belhkhawm chu Rs. 25,13,896 a ni. MLA hluite MR bill hi sorkar aṭangin pek chhuah theih loh a awm ngai lo.

MR bill nei MLA 21 zinga 11 chu Aizawl damdawi-ina inenkawl an ni a, mi dang 10 chu phai lam damdawi-ina inenkawl an ni. MR bill la zinga mi pariat chuan cheng nuai chuang an la a, a la tam ber Col. Lalchungnunga'n Rs. 4,70,150 a bill a, bill tlem ber KL Lianchia'n Rs. 12,169 a bill thung.

MLA hlui, MR bill thei hi mi 95 an awm mek a, kum 2017-18 chhung khan MLA hlui 74 chuan MR bill an nei lo a ni. MLA hlui thi tawh nupui 30 velin family pension an la thung.

MLA hlui nupui zingah kum 2017-18 chhung khan mi 10-in MR bill an la a, an lak belhkhawm chu Rs. 16,65,287 a ni. MLA hlui nupui zinga MR bill tam ber Lalhmachhuani w/o Lalthlengliana chuan Rs. 4,57,145 a la a, bill tlem ber Rualchhingi w/o PC Bawitluanga chuan Rs. 25,926 a la ve thung. MLA hlui nupuite zingah hian nikum chhunga MR bill cheng nuai khat chuang la mi pali an awm.

MLA hluite leh an nupuite MR bill atan hian Mizoram sorkar chuan kum khatah budget-ah cheng nuai 50 a dah a; kum 2017-18 chhunga MLA hluite leh an nupuite MR bill zat chu Rs. 41,79,183 a nih avangin, budget-a awm sa Rs. 8,20,817 chu an hmang zo lo tihna a ni.

FLAM-in an damloh vanga phaia inenkawl tura an kalna man travelling allowance pe tura an ngenna chu Assembly Speaker kaihhruai, General Purposes Committee (GPC)-in a ngaihtuah tawh a, mahse, a la pawm thei rih lo. Zawhna chhanna chuan, "Sorkarin Ex-MLA-te tan MR bill danah hamṭhatna siam belh tumna a neih hriat a ni lo," a ti.

MLA ni laite leh an nupuite, MLA hluite leh an nupuite MR bill danah sorkarin dân tlawhchhan a nei a; The Mizoram Salaries, Allowances and Pension of Member of The Mizoram Legislative Assembly Act, 1999 Section 18-ah MR bill theih san a chuang.

The Mizoram Salaries, Allowances and Pension of Member of The Mizoram Legislative Assembly Act Section A-in a sawi dan chuan, Ex-MLA leh an nupui/pasalte'n damlohna thila an sensote chu sorkar hriatpui damdawi-in, Mizoram chhung leh páwnah an bill thei a; mahse, zinna senso erawh a huam tel lo.

Assembly Secretariat hotute sawi danin, he dân hi kum 1999-a Assembly House-a pawm a nih hnuah August 1, 2010-ah siam danglam a ni a; siam danglam hnua Mizoram Gazette-a chhuahah pawh MLA hluite leh an nupui/pasalte inenkawlna leh an zinna senso (travelling expenses) a huam loh thu a chuang a ni.

FLAM-in MLA hluite damloh nikhuaa an zinna senso bill theih tura sorkara an ngenna hi Assembly House-ah an pawm phawt a ngai. Speaker kaihhruai GPC-in a ngaihtuah hmasak a ngai a; he Committee-ah hian chief minister, Finance minister PAC chairman R Romawia bakah, Assembly Secretariat-a committee hrang hranga chairman-te an tel. GPC hian ngun taka a ngaihtuah hnuah FLAM ngenna chu an la pawmpui rih lo.

Assembly Secretariat thawktute sawi danin, MLA hlui, term khat MLA ni tawhte'n pension hlawh thla khatah Rs. 20,000 an la a, kum khatah 5% increment a pung a, an pension pawisa a pun ve zel avangin Rs. 20,000 chuang an la tawh hlawm.

Kum 10 (term hnih) MLA ni tawhte chuan an pension tirhah Rs. 25,000 lain, a hnuah a pun ve zel avangin MLA hlui tam tak chuan thla khatah pension lawmman Rs. 30,000 chuang an la tawh a ni.

Hetih lai hian, tun hmaa MLA hluite hamṭhatna siam - buhfai, chini leh khawnvartui, etc chu sorkarin a titawp vek tawh thung.